ORANJESTAD (AAN)—Señor Carlos Martinez a splica, den conferencia di prensa, cu nan a cuminza cu e proyecto di OAA (Openbare Avondleergangen Aruba) na Juni, y na September, despues di hopi mudamento, a logra por fin di instala na e edificio di EPB, unda nan ta actualmente.
Martinez a relata locual a pasa e ultimo tres simannan. El a bisa cu dia 15 di September a organiza un info-avond pa tur e alumnonan cu e ultimo tres añanan no a haya chens di caba cu nan estudio debi na e pandemia, tambe na cambionan den Directie, etc. Esaki a haci cu nan mester a caba cu esey, a inventariza esaki, y a haya un average di 40 pa 45 ex-alumnonan. OAA ta bezig hincando un programa den otro pa tur e hobennan aki tin chens di caba cu nan programa. Dialuna 26 di September tabata tin e Cuerpo di Docentenan y tabata importante pa yama nan y informa nan kico ta OAA.
OAA ta bay cuminza cu un set up nobo, usando E-Learning. Covid a siña nan uza hopi e computer, y pesey nan tin cu haci esaki, segun Carlos Martinez a indica.
E-Learning nan ta hacie conhuntamente cu un bedrijf na Hulanda, cu yama ROBC, y nan ta biniendo Aruba di dia 10 pa 14 di October, pa papia cu e staf y maestronan cu ta bay haya un training y alavez e maestronan y tur hende cu tin di haber cu cool technique y electro-technique.
Martinez a splica cu OAA ta bay cuminza cu dos opleiding. E no mag ta un curso, pero un opleiding y esaki a wordo palabra. Nan ta cuminza cu Monteur Electro Instalatie. Martinez a splica cu ora e studiante ta caba cu e opleiding su diploma ta reconoci. E di dos opleiding ta Monteur Cool Technique cu ta esun di mas importante.
E alumnonan lo wordo yama entre 10 cu 14 di October, den oranan di anochi pa haya instruccion. Nan ta invita un pa un, pasobra e opleidingnan aki ta personaliza. Tur tin e mesun trayectoria, pero un por caba den seis luna, otro den ocho, y otro den dos aña. E meta ta pa e alumno caba cu su estudio mas lihe posible pa por contribui na e mercado laboral. El a agrega cu ROBC ta bin pa purba acredita e bedrijf y cu tur hende cu caba e opleiding ta haya un carnet, cu ta dune e poder pa e por traha riba un airco. E meta ta pa den futuro tur persona cu ta traha riba airco ta certifica.
Seguidamente, Shinouska Albertus a elabora tocante e Leertraject.
