Luna Foundation y Stichting Hunga Teca diasabra awor lo presenta e bunita proyecto 'Puppy Love'

Na Biblioteca Nacional

ORANJESTAD (AAN):  Shurman Milliard di Fundacion  Hunga Teca a anuncia cu diasabra awor 22 di April nan lo tene un evento gratis pa muchanan.

            El a duna di conoce cu Hunga Teca ta un fundacion cu a cuminsa tres aña pasa nan ta haci hopi esfuerso pa asina mucha y hoben hunto cu nan tata y mama haya diferente manera di siña pa medio di hungamento.  

            Milliard a agrega cu tambe nan tin diferente proyecto y diasabra venidero nan tin un proyecto nobo hunto cu Luna Foundation cu yama 'Puppy Love' cu tin e meta pa laga sa con un mucha por duna cariño y atencion na un puppy.

            A bisa cu door di e puppy ey un mucha tambe ta haya sa con pa caricia y con ta cuida un otro animal tambe, pero tambe un otro persona.

            E actividad ta cuminsa diasabra awor pa 9:30 am te cu 12 pm pa asina e muchanan hunto cu nan mayornan por haya e lesnan aki. Durante di esaki lo tin un haula grandi cu 20 puppy.

            E localidad lo ta Biblioteca Nacional na Playa y pa participa mester inscribi yamando na 565-6755.