Minister Geoffrey Wever:
ORANJESTAD (AAN): SER ta un organo consultativo independiente estableci pa ley, cu ta duna conseho solicita of no solicita -gevraagd of ongevraagd advies- na Gobierno di Aruba riba temanan di mayor importancia riba tereno socio-economico.
Pa medio di consulta mutuo, intercambio di opinion y argumentacion, e organo consultativo ta tuma decisionnan referente e contexto, contenido y forma di consehonan, rapportnan di investigacion y notanan cu ta wordo presenta na gobierno riba maneho socio-economico.
E constelacion di SER ta consisti di un maximo di 9 representante di cual 3 representante di organizacionnan di dunadornan di trabao, 3 representante di organizacionnan di empleadonan y 3 experto independiente. Cada miembro tin un miembro suplente cu durante su ausencia lo ta su reemplasante durante reunionnan.
Pa loke ta trata representantenan di ATIA e renombra Sr. Tristan Every como miembro y a nombra sr. Enrique de Cuba como miembro suplente.
Como representante di SIMAR a nombra sra. Angelique Roos- Qiujada como miembro di SER.
Pa loke ta trata expertonan independiente a nombra sra. Marilinda Mansur- Croes como miembro independiente y como miembronan suplente, sr. Igmar Reyes y sr. Robert Moons.
Den e mesun proceso aki tambe a despedi di sr. Ronnie van Trigt como miembro suplente representando ATIA y sra. Josephine Albertus como miembro representando SIMAR.
Minister di Asuntonan Economico, Comunicacion y Desaroyo Sostenibel, Geoffrey Wever ta desea e miembronan nobo di SER exito cu e tarea importante aki y ta gradici ex- miembronan pa nan contribucion. SER su consehonan, rapportnan di investigacion y notanan ta instrumentonan esencial y cu balor agrega pa e proceso completo di maneho y asina tambe riba desaroyo di Aruba.
