Luna Foundation su calender ta pone atencion riba situacion di cachonan riba caya

ORANJESTAD (AAN): Manera tur fundacion, Luna Foundation tambe ta busca formanan diferente pa por yega na fondo pa sigui cu nos trabaonan.

E calender a worde inspira riba calendernan internacional unda cu nos a busca diferente cabayero cu ta kere den e causa cu Luna Foundation ta para p’e, entre nan tambe algun di nos boluntarionan cu ta traha duro pa nos cachonan haya e trato y cuido cu nan merece.

   E idea di e calender ta pa enfoca riba e historia di cada un di e cachonan cu bo ta wak den e calender. Cada luna nos a enfoca riba un cacho y con nan bida tabata te na e momento cu nan a bin biba na e fundacion:

   Calender Januari: Kai & Jos Westerop. Kai a worde maltrata cu un machete y a yega Luna tur gekap. Jos ta professional kitesurfer.

   Calender Februari: Ezra & Egbert Leest. Ezra a worde haya den Santa Cruz, tur na sarna y unda cu su doñonan a lague atras pa su cuenta den mondi. Egbert ta un biker y IT-er.

   Calender Maart: Desi & Robbie Lioe-A-Tjam. Doñonan di Desi a mar’e den solo cayente pafo di e fundacion y lague atras mientras cu e tabata na estado. Desi a perde tur su babynan. Robbie ta handyman na un scol basico y ta stima bestia.

   Calender April: Monique & Egmond Molina. Monique su doño no por a cuid’e mas y Luna a take care di dje y su babynan. Egmond a kibra tres record mundial den Guinness Book of World Records.

   Calender Mei: Puppies & Jacco & Victor Vroegop. Tur dia Luna ta haya cantidad di puppies cu mester busca un destino pa nan pa nan no muri dehidrata y yen di hamber riba caya. Jacco ta director di hospital di Aruba y Victor ta su yiu. Ambos ta stima bestia.

   Calender Juni: Cosco & Edwin Jacobs. Cosco su doño a pasa auto riba dje y no por a hib’e dokter pa tratemento y asina Cosco a perde un pia. Prome nan kier a pon’e cacho drumi pero Luna Foundation a take care di dje y awe Cosco ta un cacho feliz cu tres pia. Edwin ta director di un instancia gubenamental y ta gusta haci deporte y ta stima bestia.

   Calender Juli: Puppy & G-Qion Ridderstap. E puppy aki a worde haya tira den un caha den mondi caminda hende a lague atras pa e muri. G-Qion ta un hoben cu ta boluntario di Luna y ta bin tur siman p’asina cuida e cachonan. Mester cuminsa di jong pa siña nos hobennan stima bestia.

   Calender Augustus: Dos puppy & Jani Croes. Luna tin hopi puppies cu ta busca un hogar pa dunanan amor y atencion. Jani Croes ta un architect y artista y ta e diseñador di un escultura conoci riba nos isla.

   Calender September: Django & Dalton Conijn. Par di cunukero a haya Django mitar morto tira den mondi y a hib’e Luna Foundation. Di un cacho brabo cu miedo di hende, awe Django ta un cacho salud y feliz y asta tin un chick cu yama Charlotte ta biba cune den su haula. Tur dos ta warda pa topa un famia cu kier adopta nan. Dalton ta un hoben cu ta dedica su tempo y pasion tambe como voluntario na Luna Foundation.

   Calender October: Santos & Picho Ho Sing Loi Jr. Algun mucha di scol a rescata Santos for di riba caya y a trece na e fundacion. Picho ta un boluntario di Luna Foundation.

   Calender November: Olive & Glenn Rock. Olive a bin for di e Centro di Control di Cacho unda cu hendenan a lague atras flaco y pata pata di carpata y purga. Awe e ta full saludabel y ta warda riba un persona cu kier dun’e amor y dedicacion. Glenn ta un professional den ramo di Safety & Security.

   Calender December: Puppies & Jose Isebia. Mas puppies cu ta worde laga atras riba caya pa nan muri. Luna ta yuda pa haya un doño pa nan haya un cas sea na Aruba of den exterior. Jose ta un boluntario di Luna Foundation.

   Un Birthday Calendar ta un concepto di calender diferente unda cu ta enfoca riba e luna y e dia. E calender no ta mara na e aña y asina pues e calender no ta caduca ora cambio di aña yega. Bo ta yena e cumpleaño di bo ser keri riba e fecha y tur aña e calender lo recordabo e fecha di cumpleaño. E calender ta un collector’s item di Luna Foundation y ta e prome den un serie di collector’s items cu nos lo lo produci pa asina por sigui recauda fondo. Y si bo ta puntra bo mes pakico hende homber so? Esaki ta paso nos tin diferente sorpresa na caminda e aña nos dilanti. E calender aki ta simplemente e comienso!

   Pakico mester reserva e calender: Luna Foundation ta un fundacion y e meta ta pa nos recauda fondo. Ta imprimi e calender segun e cantidad di pedida. Mas boso reserva, mas fondo nos lo por recauda y e imprenta ta sali nos asina na un miho prijs cu si keda print den cantidad chikito. Nos a imprimi un cierto cantidad awo cu ya caba ta practicamente sold out y cu boso reservacion nos por print mas y asina recauda mas fondo pa nos por sigui informa y educa comunidad y duna e cachonan un di dos chens den bida.

   Por reserva e calender via Luna Foundation su facebook page.  Si tin hende of instancia cu ta desea di haci un donacion na Luna Foundation y ta desea di haci esaki por medio di cumpra un cantidad di calender, esaki semper ta posibel y por tuma contacto cu e fundacion pa haci nan pedido.