For di 40 aña pasa e area unda Proyecto Secrets ta bin ta destina pa traha un  hotel

Otmar Oduber ta remarca:

*E ta ancra den ley ROP y ratifica den ROPV! 

ORANJESTAD (AAN)—Den conferencia di prensa, ex-minister di Turismo, Otmar Oduber, a bisa cu ta hopi importante pa, den e discusionnan cu ta andando relaciona cu un proyecto sumamente relevante pa Aruba na prome lugar, y sigur pa San Nicolas, cu ta Hotel Secrets, pa e duna algun informacion.

Oduber a señala cu esaki ta un proyecto riba cual el a traha masha duro mes, durante hopi aña, y cuater aña pasa cu el a abandona gobierno el a laga e proyecto practicamente cla pa inicia su trabao, sinembargo awe, cuater aña despues di un pandemia, por wak cu e proyecto aki ta confronta su retonan.

“Awe mi no tey mas pa defende e interes di Secrets Resorts, mi ta kere cu nan mes ta capacita pa haci esaki, pero si pa defende e interes di pais Aruba y muy particularmente, di San Nicolas” Oduber a señala.

Oduber a repasa kico a sosode e ultimo cuarenta añanan, unda cu tur gobierno na turno, a papia di un hotel pa San Nicolas, a purba traha uno, a pone bloki pa prome biaha, bao tur gobierno di tur signature; sinembargo, no a logra.

“E area di cual nos ta papia aworaki, ta unda tin e clifnan na Seroe Colorado, pariba di Baby Beach y  no riba Baby Beach, sino riba clif, e seroe chikito cu tin, ta caminda cu e proyecto aki ta bay tuma luga”, Otmar Oduber a remarca.

Oduber a subraya cu esaki ta un area cu for di 40 aña pasa a wordo destina pa desaroyo turistico, y despues den añanan 85-90 e grupo Sasaki a identifica e area aki como un desaroyo economico di turismo pa nos pais, y a wordo ancra den e leynan di ROP, na aña 2009 te cu 2019, cu a bolbe wordo ancra pa diez aña mas den ROP cu e area aki ta destina pa traha hotel y pa crea desaroyo turistico pa Aruba.

“Banda di e dos leynan aki ROPV tambe a bin na vigor na aña 2021. Esaki ta un ley cu mi a traha hopi riba dje y lague atras caminda a crea e oportunidad pa e hotel aki bin pariba di nos Isla”, Oduber a señala.

El a agrega cu den pasado a negocia cu e grupo Piñero. “Bao di Gabinete Eman II nos a atrae e grupo Piñero pa bin traha un hotel pero, lamentablemente, mi a abandona Partido AVP debi cu diripiente a cambia di direccion y a cuminza entretene e idea pa un refineria, cu awe nos tur sa kico e resultado di dje tabata. Un cantidad di hende cu a wordo deteni of cu ta wordo extradita aworaki pa Merca, pa responde na un grupo di hende cu tabata hopi cerca di e refineria, y cu e tempo ey a pone cu e grupo Piñero y e hotelnan a dicidi di abandona, y despues señor Piñero mes, cu tabata esun cu tabata enamora di e Isla di Aruba, a fayece y a perde contactonan cu e grupo aki”, Otmar Oduber a relata.