ORANJESTAD (AAN): Minister di Enseñansa a firma un MoU cu Consul General di Merca staciona na Curaçao, Sra. Margy Bond relaciona cu EducationUSA.
E acuerdo aki ta habri porta pa e studiantenan di Aruba y ta brinda nan mas oportunidad pa por continua estudio avansa na Merca pa un bon tarifa. EducationUSA Aruba ta un centro internacional cu ta brinda e studiantenan cu ta continua cu nan estudio avansa na Merca conseho, informacion, guia y sosten.
EducationUSA Aruba tin oficina den edificio di JFK Center, y e MoU aki, lo duna espacio pa traha hunto, stimula, inspira y motiva nos studiantenan cu tin e posibilidad pa continua cu nan estudio na Merca. Tambe, promove y/of crea un plataforma mas grandi y oportunidad pa nos studiantenan por continua nan estudio avansa na Merca.
Na Merca e programanan ta diferente y progesivo. Sigur esaki ta yuda ora e studiante finalisa nan estudio pa e “brain gain”. E studiantenan ta bin bek pa contribui cu Aruba y yuda nos pais sigui desaroya. “Esaki ta e vision y nos ta contento cu e firmamento di e MoU aki”, Minister Endy Croes a expresa. Pa conclui, mandatario di Enseñansa Endy Croes, a felicita Pueblo di Aruba, alabes ta gradici Consul General Sra. Margy Bond y su ekipo.
