Lucky Store ta un negoshi familiar cu tin mas di 25 aña sirbiendo pueblo di Aruba

Entrevista cu Kapil Sawilani, Operations Manager/Management di Lucky Group Stores

ORANJESTAD (AAN) – Matutino DIARIO a entrevista señor Kapil Sawilani, Operations Manager/Management di Lucky Group of Stores, na e oficina principal situa na Italiestraat.

Manera ta conoci esaki ta un negoshi familiar, cu tres sucursal na Aruba, y señor Sawilani a conta nos un tiki historia di con esaki a wordo lanta.

“Lucky Store ta un compania cu tin ongeveer, mas cu 25 aña na Aruba. Nos ta sirbiendo e pueblo di Aruba den sentido cu nos tin yen sucursal rond di Aruba, cu ta bende productonan di bon calidad y na bon prijs. Cada aña nos ta purba di bin cu productonan nobo, innovativo, loke ta mas ‘hot’ den e mercado. Semper nos ta haci nos best pa tin esey den nos tienda”, Kapil Sawilani a relata.

Lucy Store ta bende paña, zapato, tur cos pa cas pa sala, baño cushina, etc. Y e ta un compania hopi grandi den articulonan electro-domestico manera nevera, frishider, airco.

“Y nos ta representa un par di e marcanan mas grandi na mundo, na Aruba mes; por ehemplo Daikin cu ta un marca di airco, tambe nos ta representa LG y Samsung.

Den nos seccion di baño y den nos seccion di cushina tambe por haya e marcanan Curver y Steriliter y nos ta sigui bezig ta busca yen di otro marca cu ta di calidad, pa por duna e pueblo di Aruba na bon prijs. Aworaki nos ta cuminzando cu Goodyear pa un par di articulo pa auto tambe”, Sawilani a menciona.

E negoshi Lucky Store a cuminza na aña 1994, kiermen e tin mas of menos 27 aña riba nos mercado.

“Nos tin e negoshi aki eigenlijk, den diferente isla y nos a dicidi pa bin Aruba pasobra nos a mira un oportunidad hopi grandi ya cu no tabata tin algo manera nos, e tempo ey riba e isla aki. Nos a dicidi di bin Aruba y ora nos a pone pia riba e mercado nos a haci nos best akinan,  y nos a sigui haci tur aña tur posible, pa asina improve pa nos sigui brinda e servicio cu nos kier na nos clientenan”, el a señala.

Tocante e situacion di pandemia, Sawilani a relata con e negoshi a bay compara cu añanan anterior.

“Durante e pandemia, nos mes como un compania a cambia nos estrategia, pasobra nos tabata sa cu nos tin hopi gasto pa cubri, yen cos pa haci, empleado pa paga. Esey nos a haci, nos a corta hopi gasto di nos compania mes, pa nos por keda sobrebibi e añanan aki, y nos por bisa cu nos a sobrebibi. Tambe nos a haya un golpi duro ora nos warehouse a kima, pero wak nos, nos ta riba pia awo y nos ta sigui brindando e servicio cu nos mester na Aruba, anto nos ta sigui draai. Nos ta sigui den e lucha pasobra ora bo wak e sonrisa di bo clientenan, ora bo wak cu nan si kier drenta bo negoshi, nan si kier haci compra, e ta duna bo e motivacion y disciplina pa bo sigui draai tur dia; sigui brinda e servicio manera mi a bisa, bay busca productonan den exterior, anto haci bo best pa e productonan ta na bon prijs pa e clientenan por cumpra”, Kapil Sawilani a bisa nos.