Lucky Store ta ampliando su variedad di producto nobo cu entre otro, paña mas fashion

Kapil Sawilani di Lucky Stores Group: - Kapil Sawilani ta invita henter pueblo pa djis bay mira!

ORANJESTAD (AAN) – E Operations Manager/Management di Lucky Group of Stores, Kapil Sawilani, den entrevista cu DIARIO a elabora tocante e ubicacion di Lucky Store na Oranjestad, encuanto su accesibilidad pa e clientenan.

E localidad mas grandi cu ta Lucky Super Store, situa na dos caya di Caya Grandi, riba J. G. Emmastraat, ta hopi accesible pa e clientela. E tin un caya su dilanti cu trafico por pasa, y tambe hende por cruza, ademas cu tin varios parkinglot banda di e tienda. Kapil Sawilani ta kere cu nan localidad ta hopi bon.

Sawilani a duna su comentario encuanto e situacion di Aruba actualmente compara cu antes.

“Como comerciante, mi por bisa cu Aruba a cambia hopi, den sentido cu tur hende a pasa den e pandemia y nan a ripara cu tin yen di cos cu bo tin cu cuida di bo mes, di bo famia, y cu tin mas cos cu mester duna mas prioridad den dje, den bida, pasobra bo nunca sa ki dia un pandemia por pasa di nobo. Mi ta kere cu Aruba si ta un Isla cu a lucha durante e pandemia, pasobra bo ta wak e otro Islanan y mayoria di nan ainda, bo no ta mira tanto movimento cu bo ta wak na Aruba”, el a señala.

Como comerciante, Kapil Sawilani kier mira pa Aruba den un futuro cercano, ta pa e comunidad y e clientenan cu Lucky Store tin, sigui stima nan Isla. Esey ta e speranza cu e tin.

“Mi ta kere cu si comunidad di Aruba sigui stima su Isla Aruba lo bay dilanti, y si Aruba bay dilanti e comercio, e economia tambe lo bay dilanti.

Ya…nos ta den un epoca hopi interesante pasobra nos no sa si nos ta saliendo di e pandemia; nos no sa kico ta bay pasa, pero mi ta kere cu si tur hende, e comunidad di Aruba, e comerciantenan keda duna e cien porciento pa Aruba, nos lo sigui dilanti” Sawilani a expresa.

E plan pa futuro di Lucky Stores Group, ta pa sigui duna e mihor servicio cu tin pa Aruba, pa su clientenan.

“Y na di dos lugar, claro nos kier expande, wak otro oportunidad cu nos por haci na Aruba, y nos aworaki na corto plazo, nos unico expansion ta cu nos ta biniendo cu productonan cu otro hende no tin. Nos ta hay wak pa mas marca di electronics, wak pa pañanan mas nobo, mas fashion, y nos tin un proyecto pa haci nos variacion mas grandi; kiermen, mas color, mas style, mas size, y esey tambe nos ta bezig cune awo”, Sawilani a remarca.

Finalmente, Kapil Sawilani a extende un invitacion na pueblo di Aruba, pa pasa na Lucky Store wak nan coleccion nobo, tur e proyectonan cu nan a haci den e tienda. “Nos a pone rekinan nobo pa mustra mas mercancia. Nos ta bezig cu un proyecto pa haci nos entrada mas bunita, y tambe pa haci nos display di electronics mas atractivo pa e clientenan, anto claro ora bosonan pasa boso por puntra loke sea. Bo no mester bin pa cumpra; claro esey ta bon si bo cumpra, pero bin pa djis wak e productonan, loke nos tin y wak cu nos ta sigui ta un di e miho tiendanan na Aruba”, Kapil Sawilani, Operations Manager di Lucky Group of Stores, a conclui!