Minister Dangui Oduber: tabata tin mas di 13 mil turista
ORANJESTAD (AAN): Minister di Turismo y Salud Publico, Sr. Dangui Oduber ta satisfecho di mira un “Long Weekend” di himno y bandera sumamente exitoso pa Aruba su turismo y economia. Den e tres dianan esta 18, 19 y 20 di maart a yega 13.103 turista na nos aeropuerto, esaki ta sin conta e 4 barconan crusero cu tambe tabata mara den nos waf riba e 3 dianan aki. Desde 19 di maart niun turista y local cu yega Aruba no mester presenta y ni haci un PCR test mas, e seguro di COVID si ta keda na vigor pa e turista. Di e manera aki ta flexibilisa e ‘’inreisbeleid” pa asina sigui percura pa atrae mas turista.
Riba diabierna a yega un total di 3588 turista via nos aeropuerto di cual 2966 tabata procedente di Estados Unidos. Diasabra a yega un total 5725 turista Aruba di cual 4816 tabata procedente di Estados Unidos y diadomingo un total di 3790 turista di cual 3095 turista tabata Americano. Estados Unidos ta keda Aruba su mercado di mas importante, pesey semper ta keda monitoria e ruta nan aki di serca.
Minister Oduber a indica cu ta proyecta cu pa aña 2022 lo tin un recuperacion di entre 85% pa 100% di turismo den comparacion cu aña 2019 cu tawata Aruba su miho aña den historia. Gobierno di Aruba ta sigui enfoca riba recuperacion di turismo pa asina recupera e economia y crea oportunidadnan cu pais Aruba tin mester di dje.
Aruba ta keda e destinacion number 1 den henter Caribe pa loke ta nos recuperacion. Minister Oduber ta satisfecho cu nos turismo ta sigui recupera, sigui crece y crece nos economia. Nos ta sigui traha pa nos por surpasa nivelnan di aña 2019. Turismo ta keda e driver principal di nos economia.
