Encuentro cu Consulnan honorario ta paso positivo pa e pais --- *Statuut ta regla representacion oficial di Reino den exterior --- *E bienestar di Aruba y e Arubiano den exterior mester wordo sirbi
ORANJESTAD(AAN)- Na varios ocasion DIARIO a atende e bon relacion cu mester existi entre Aruba y representacion Hulandes den exterior.
Contacto directo entre Aruba y sigur e Cuerpo Consular na Merca y otro paisnan cu cual Aruba kier mantene un relacion estrecho, ta sumamente importante.
E encuentro entre Ministro Plenipotenciario di Aruba na Washington, mr. Joselin Croes y Consulnan Honorario di Reino na Merca, ta habri caminda pa un bon contacto entre Aruba y e personanan cu mester sirbi como punto di contacto di Aruba na e lugar cu nan ta estaciona.
Na momento cu Ministro Stef Blok a bini Aruba cu un cantidad di exigencia enfrente Venezuela, ya DIARIO a sostene un punto cu a bini dilanti, cu ta cu Ministerio di Relacionnan Exterior di Reino, lo a uza e representacionnan directo di Reino den exterior na interes di Aruba tambe.
Segun Statuut, e pais Aruba cu ta parti di Reino Hulandes, no por tin su propio representacion den exterior.
Esaki ta nifica cu Aruba no tin su propio Embahada, cu ta representa un pais oficialmente den exterior.
Aruba tampoco tin su propio Consuladonan, cu ta atende cu e interes di Aruba y e Arubianonan manera den asunto di negoshi of servicionan cu nan mester ricibi.
Un representacion den exterior, sigur den nos mundo cu a bira mas chikito, tin un importancia grandi.
Un persona cu a tende di Aruba, por dicidi cu e ta haci informacion na un Consulado riba Aruba.
E kier ricibi mas informacion di Aruba pa cualkier motibo. E por ta un mucha cu ta bay skirbi un thesis na school. E por ta un orador cu kier inclui Aruba den su charla. E por ta un musico cu kier presenta algo di Aruba.
Pa un persona por haci nan trabou, nan mester ta ekipa pa haci esaki, loke ta nifica cu nan ta conoci cu e pais di cual nan ta duna informacion pero cu tambe nan ta sirbi.
Pa economia di un pais, un consulado tin importancia grandi. Ora ta papia di asuntonan cu ta atende cu economia di un pais manera Aruba, cu ta depende tanto di exterior, e conocemento cu e personal di Consulado tin di e pais, ta sumamente importante mescos cu e bon relacion cu e ta mantene cu gobierno di e pais.
Un Consulado di un pais ta ensancha e base entre e pais, caminda e ta posiciona, cu e pais cu e ta representa riba su tereno.
Un Consulado General ta uni diferente Consul riba diferente tereno cu ta inclui cultura di e pais tambe.
Informacion na publico pa medio di consuladonan, tin un balor hopi grandi sigur pa un pais basa riba turismo manera Aruba, cu pa medio di un consulado por splica con e ta drecha su beachnan pa sirbi bishitantenan, e cantidad di idioma cu su Pueblo ta domina y e incentivonan cu tin pa inversionista.
Informacionnan valioso ta forma parti di boletinnan cu den tempo moderno, ta aparece hasta riba medionan social.
Aruba ta den un situacion di recuperacion economico, cu ta nifica recuperacion comercial. Den esaki consulado, como mision comercial, ta hunga un papel importante pa Aruba pero tambe pa e comerciante Arubano y atraccion comercial pa Aruba.
Pa un persona por haci un bon trabou, e mester conoce loke ta forma su trabou.
DIARIO ta sostene mantencion di un relacion di Gobierno di Aruba cu embahadanan di Reino, cu Consuladonan General, Consulnan di carera pero tambe Consulnan Honorario, cu ta personanan cu ta biba na un lugar y ta wordo encarga dor di Reino pa asisti e pais y su ciudadanonan sigur riba tereno comercial.
Mas estrecho e relacion cu gobernante di Aruba, mas posibilidad pa un bon relacion!
