Stanley Dabian vocero di DCA:
ORANJESTAD (AAN) – E vocero di Departamento di Cultura, señor Stanley Dabian, tambe a hiba palabra den conferencia di prensa relaciona cu e obra musical “Planta awe pa cosecha mañan”, cu Maria College Mavo y Ferdinand Franca, lo presenta e dianan 8 y 9 di April proximo.
Manera ta conoci esaki ta den contexto di e di 80 aniversario di Maria College, y cual ta dedica na e musico Vicente Ras.
Maria College Mavo tin e tema Arte pa celebra nan 80 aniversario. Dabian a expresa cu “planta awe pa cosecha mañan” ta netamente loke ta sosode riba un stage, pasobra tur arte ta haya e oportunidad di expresa, existi, bida, e poder di color, sonido, musica, canto, baile, movecion.
El a bisa cu como Departamento di Cultura, manera nan a wordo acerca door di meneer Ferdinand Franca, no solamente a kere den e proyecto, pero e ta dentro di e prioridadnan di educacion di arte y cultura cu DCA ta promove.
El a expresa cu DCA ta gradici cu e tempo dificil a pasa y e escenario por bolbe haya bida. Pesey mes, e ta invita pueblo pa no perde e gran musical aki, e fechanan ya menciona, compra e carchi y bin duna apoyo na nos hobennan y un scol cu tin 80 aña di existencia y hopi ta e ex-alumno y ex-maestronan cu lo lesa e informacion aki y lo bin celebra en grandi “planta awe, cosecha mañan” pasobra aki Arte tin bida, y e alumnonan ta cla pa demostra kico nan por. “Planta awe, cosecha mañan” ta e intencion di e fundacion CCCA y di Ferdinand Franca”, Stanley Dabian a subraya.
