Long Table di Wind Creek ta mas cu solamente come dushi cuminda

*Varios hende lo desea pa e evento wordo organisa mas biaha pa aña

ORANJESTAD (AAN): Recientemente a tuma lugar pa di 7 biaha, e famoso evento di Wink Creek yama ‘Long Table Aruba’, unda cu un biaha mas 1000 persona a disfruta di un cena di tres curso, un show di acrobacia, un banda y un DJ y un biaha mas tabata tin un tremendo ambiente.

DIARIO a combersa cu diferente persona cu a disfruta di e anochi, incluyendo personanan cu a participa varios biaha an e Long Table.

Mayoria a duna di conoce cu dimes e anochi ta uno unico, unda cu asina tanto hende ta sinta hunto riba Boulevard pa come y bebe, pero e anochi pa nan ta mas cu come dushi so.

Bo ta pasa momentonan agradable cu bo amigo, amiga, casa, of famia, mientras cu bo ta topa tin biaha hendenan cu bo tin basta tempo sin wak.

Mayoria hende a gusta e show di acrobacia y a disfruta di e bunita variacion cu e banda musical a trece.

Banda di esaki tur hende cu ta participa ta aporta na un of mas causa importante, cu e contribucion financiero.

Esey ta locual varios di e participantenan na e Long Table ta menciona como nan motibo pa tur aña purba cumpra un ticket pa e evento.

Hopi persona cu DIARIO a papia cu ne te hasta ta bisa cu quizas lo ta un idea pa organisa e evento mas cu 1 biaha pa aña.

Sigur mirando tambe e cantidad di persona cu ta desea di bay na un evento di Long Table, pero pa cualkier motibo no a logra haya un carchi.