Long Table Aruba a haci donacion di 100 mil Dollar na Stichting Hunto

Wind Creek Aruba su evento a crea impacto

ORANJESTAD (AAN): Diadomingo anochi, e di siete edicion di Long Table Aruba, un evento culinario caritativo presenta pa Wind Creek Aruba a sobrepasa un biaha mas tur expectativa y a finalisa cu un gran sorpresa, marcando un otro momento importante den impacto pa nos comunidad y donacion pa Aruba. Un cena completamente na blanco pa 1.000 persona balora na $60.000.

   Desde aña 2017, Long Table Aruba a recauda mas di $395.000 pa organisacionnan local y ta un evento sumamente importante pa Wind Creek na Aruba.

   “Nos ta compronde e importancia di conecta cu e comunidad y nos ta desea di sostene organisacionnan local na e manera cu lo realmente ta beneficia e comunidad di Aruba,” “Long Table Aruba ta hopi mas cu un cena pa 1000 persona: e ta un simbolo di kico nos por logra hunto como comunidad,” ta loke Paul Gielen, Gerente General di Wind Creek Aruba a declara.

   DIARIO a nota cu Sr. Gielen tabata para na entrada di e evento ta saluda tur hende cu a yega, y tabata hasta pose pa saca potret cu e huespednan.

   Sr. Gielen a splica cu e aña aki, Wind Creek Aruba a tuma un decision conciente pa scoge un solo organisacion esta, “Stichting Hunto” cu e meta pa logra un impacto mas profundo y realmente significante. Asina aki “hunto ” nos por ofrece e personanan aki den necesidad un mihor structura y un bida nobo. Sr. Gielen a sorpresa tur presente como tambe e organisacion cu un check di $100.000 enbes di $60.000, esaki ta un donacion generoso cu Wind Creek Aruba a otorga pa por logra e meta di “Stichting Hunto”

   Stichting Hunto ta un organisacion cu ta traha y pone enfasis pa mehora salud mental, problema emotional of di conducta na Aruba, ofreciendo un espacio sigur, respet, guia y speranza na tur cliente como tambe na e famianan. Cu e donacion aki, “Stichting Hunto” lo implementa un unidad mobil multifuncional pa cuido, cu lo por ofrece  servicionan esencial, incluyendo sosten medico of apoyo psicologico directamente na esnan cu mas mester di dje na unda cu ta.

   MC di anochi tabata Erin Croes, y DIARIO a keda impresiona cu e acompañamento musical di Sunny Ray en vivo ofreci pa Angelo ‘Mak’ Koolman y Jeremy Bonarriva.

   E anochi aki tabata un celebracion di bondad y di union den nos comunidad, Long Table Aruba no tabata posibel sin e gran sosten di diferente partners, ta bisa danki di curason na tur esnan cu a contribui, cumpra nan ticket, yuda, y sostene e evento cu tanto amor tur aña.