Auto a bolter violentamente varios biaha riba Green Corridor

Tur hende buscando un dama perdi den accident

ORANJESTAD (AAN): Diasabra marduga den careda di 4:00 am, Central di Polis a cuminza ricibi yamada cu riba Green Corridor direccion pariba, poco pariba di Young Fellow Bar & Restaurant na Rooi Barcadera, nan a bin topa cu un auto completamente destrui gekenter mey-mey di e caminda, y cu tin hende herida.

   E prome unidad di Polis cu a yega, a bin topa cu un auto sedan Toyota Corolla color shinishi gekenter riba caminda.  Polis a mira cu banda di caminda, cerca di vangrails tin un persona masculino herida.  No ta conoci si acaso e boltermento a saca e persona di e auto, of si acaso e prome testigonan cu a yega a yuda pa saca e persona di e auto, y a pone banda di caminda cerca di vangrails.

   Ambulance tambe a yega, y ora cu autoridad ta papiando cu e persona herida, el a informa cu e tabatin un persona femenino mas cu ne den e auto.  Pero e testigonan eybanda a bisa cu nan a mira e persona aki so, y no a mira ningun dama.

   Personal di Vehiculo di Rescate di Bombero tambe a yega, y e ora nan tur hunto a dicidi na busca rond den e area pa check si acaso enberdad tabatin un dama den e auto, y lo a wordo catapulta di esaki ora cu el a bolter.

   Pero e buskeda rond di e area no a produci nada.  Paramediconan a stabiliza e victima y a pone riba brancard pa hibe Servicio di Emergencia na Hospital.

   Mirando cuanto biaha e auto aki a bolter, cu e impactonan na su body, y manchanan laga atras riba caminda, Polis por deduci cu esaki tabata coriendo cu velocidad extremadamente halto.  Awor e auto a keda tur destrui, y riba e caminda a keda basta pieza di auto gespat tur caminda.