Segun Directora Respaldo Caroline Hart:
*Pa tin claridad con e cooperacion mester bay
ORANJESTAD (AAN): Den un entrevista recien cu DIARIO, Directora di Respaldo, señora Caroline Hart a remarca cu semper Respaldo y KPA ta traha hunto. El a enfatisa cu e Departamento di crisis di Respaldo a wordo inaugura na october 2024 hustamente pa brinda sosten na KPA y yuda den casonan unda cu polis cu ta traha riba caya haya nan confronta cu comportacionnan di ciudadanonan cu nan no ta comprende entre otro un scicosis psikiatrico.
Den casonan asina, nan por comunica cu Departamento di Crisis di Respaldo. Un enfermero psikiatrico lo atende yamadanan pa duna sosten y unda ta necesario yega na e localidad pa brinda asistencia.
Señora Hart a splica cu desde september 2025, tin un concepto di samenwerkingsprotocol entre Respaldo, KPA y Dienst di Ambulance di Imsan pa asina tin coordinacion di e trabounan y cada ken por sa ken y na ki momento tuma over den situacionnan asina. Pronto manera tur aprobacion keda cla, lo firma e protocol aki.
“Esaki ta hopi importante pasobra tanto pa e straatdienst di KPA como pa enfermeronan di Respaldo cu ta haci e servicio ambulante, tin claridad con e cooperacion mester bay segun protocol. Mientras tanto, e cooperacion ta sigui entre e entidadnan aki mientras ta warda pa e protocol ta firma”, Señora Hart a splica.
