Loke studiantenan di Colegio San Antonio a uza pa bay scol sin tas

ORANJESTAD (AAN): Ultimo tempo DIARIO a tuma nota cu e trend aki yama “Anything but a back pack” a wordo declara pa un dia na diferente scol na Aruba.

   Esey ta un solo dia, unda cu alumno no mag di bay scol cu tas.  Pero e tin di escoge un forma unico pa bay cu su bukinan di scol, schrift, pen, potlood, calculator, etc.

   Recientemente directorado di Colegio SanAntonio MAVO tambe a organiza esaki, como parti di nan asina yama ‘Spiritweek’.

   Resultado di esaki tabata un dia masha dibertido mes, y hasta por a mira cu e Director di Scol mes a bay traha e dia ey sin tas.  Na su lugar el a bin cu algo cu ta parce un backdrop pa un Pesebre.

   Hasta ora e muchanan ta cruza caya pa bay scol, chauffeurnan tabata mira muchanan ta pusha e.o. un hemchi riba wiel pa bay scol cu ne, cu nan material di scol den nan.  Aki por mira mas di e dia special aki.