ORANJESTAD (AAN) E dianan di fiesta aki, manera ta sosode tur aña, e supermarket local ta bay depende hopi di e bishitantenan pa nan logra suficiente entrada,
pa motibo cu hopi hende local, logicamente consumidor fiho di e diferente establecimentonan aki, ta biaha principalmente sea pa Merca, Hulanda, Colombia, Argentina, y otro partinan di mundo.
Generalmente nan ta sali for di Aruba pa un par di siman, pa regresa prome cu scol cuminza, ya cu e biahenan aki ta wordo haci den famia. Tin indicacion cu mayornan cu tin yiu cu ta bayendo kleuter, cu na scol ta haci hopi cos cu lego, ta bay biaha pa Legoland, cu locual e muchanan kier experiencia pasobra nan ta wak hopi bunita propaganda den television, y sigur, famianan cu experiencia e bishita na Legoland caba ta comenta cu e ta algo masha bunita y cu hasta ta ofrece hotel eybanda, cu ta un facilita hopi nan estadia.
Loke si a wordo comenta na DIARIO, ta cu esaki ta un destino hopi costoso. Tin mayornan cu a cuminza spaar pa mas cu dos aña caba pa por bay disfruta di e destino novedoso aki. Y manera custumber, hopi di nos ciudadanonan ta gusta bay Miami, Florida, specialmente bishita Orlando cu tur su atractivonan, cu famianan completo ta disfruta di dje.
Y no por laga afo, e cantidad di residentenan Colombiano cu ta bay pasa e dianan aki cu nan famia, y e mayornan cu tin yiu ta studiando na Hulanda y cu pa un of otro motibo no ta bin Aruba, mas tanto esnan cu a caba di bay y cu sigur ta sinti falta di nan mayornan y mas den e epoca emotivo aki. Pues, cu bishitantenan cu lo ta yegando Aruba, y localnan cu ta bayendo afo, bon por spera cu Aeropuerto Reina Beatrix lo sigui sumamente druk for di December y kizas te despues di Carnaval 72.
