Cuarenta aña despues cu Aruba a mara su futuro na Florin fuerte
*Gobierno Wever-Croes a resta placa den su maneho di 2023
*Florin Arubano fuerte y 25 Miyon liber den mundo caotico
ORANJESTAD(AAN) — Uno di e exigencianan mas grandi cu como lider di un causa, Betico Croes mester a honra, tabata, pa entrega prueba na momentonan di crisis grandi, cu Aruba no ta hala atras pero Aruba ta logra.
E lucha di Aruba pa autonomia a haya mas rosea, ora e sistema di Antia Hulandes a deshaci di e derecho di Aruba pa su partido politico mas grandi, por a haya participacion den gobierno Antiano, loke mester a frena e lucha.
Ta na e momento cu Statuut no por a honra e alma di su contenido, bou direccion di Betico Croes na 1977, e lucha pa Status Aparte a alcansa momentum den Reino pa na 1983 Aruba a logra un acuerdo pa su Status Aparte dia Prome di Januari 1986.
E lucha pa Status Aparte tabata un plan pa maneho total di Aruba y tabata basa directamente riba garantianan pa bienestar di e pais y tur Arubiano, loke mester a wordo garantisa dor di un base financiero solido y husticia real pa e nacion y tur Arubiano.
Esaki a haci cu Ministerio Publico a bira asunto Arubano pa asina garantisa cu nunca un persona por wordo persigui inhustamente na e pais Aruba pero tambe cu e maneho monetario di Aruba, tambe lo tabata den man di Aruba.
E motibo pa cual Aruba a lucha pa su propio Florin y Banco Central, awe ta wordo presenta na e generacionnan nobo na forma practico na momento cu Gobierno Evelyn Wever-Croes, a anuncia cu pa prome bez den historia, su Gobierno no ta pidi Parlamento mas placa pa gasta na 2023 pero ta bisa Parlamento cu el a resta placa na 2023.
Awe Aruba ta contesta e persecucion di Hulanda pa acepta supervision di e maneho financiero di Aruba, cu un les pa Hulanda con mester atende cu placa di Pueblo, cu Hulanda no por a haci na 2023 y tin Pueblo Hulandes den lamento.
Pa comprende bon kico a pasa na Aruba y kico ta e logro grandi di Gabinete Wever-Croes, mester bay na e base di bon gobernacion di Aruba cu ta exigi pa Gobierno percura pa Aruba tin mas entrada cu gasto den su presupuesto total.
Segun ley, prome cu un aña bati na porta, Gobierno mester a ricibi aprobacion di Parlamento pa placa cu Gobierno kier gasta.
E cifranan cu Gobierno a prepara hunto cu su cuerpo di expertonan pa un aña, ta representa e presupuesto, e calculacion oficial pa entrada y gasto di e pais.
Historicamente a bira norma, cu mas gasto cu a wordo calcula ta wordo haci y cu mester bolbe Parlamento, pa pidi aprobacion pa mas placa pa medio di un calculacion adicional di sumanan cu mester pa cubri e gastonan real.
A bira pracicamente tradicion politico cu gastonan imprevisto ta haci cu mester cambia e sumanan cu Parlamento, na nomber di Pueblo, a permiti pa gasta.
Gobierno Wever-Croes a cambia e tradicion cu ta afecta un bon maneho di placa y a logra den ultimo temponan bini cu calculacionnan di cifranan den cual tabata tin placa pa cubri tur gasto.
Na final di 2023, ora Gobierno Wever-Croes segun tradicion politico, lo mester a bay pidi mas placa na Parlamento pa por tin fondo pa goberna te na final di 2023, Gobierno Wever-Croes a splica Parlamento di Aruba, cu el a resta placa y a bisa Aruba cu a resta 25 Miyon cu e no a uza a pesar cu esaki tabata posibel, loke a haci cu a resta 25 Miyon Florin.
Na 2023, esaki sigur ta un logro enorme, debi na e situacion mundial confuso cu na hopi pais, manera Hulanda mes, ta causa maniobranan pa entrada por cubri gasto.
Den Reino Hulandes, Gobierno Wever-Croes, a splica henter mundo cu e no mester mas placa pero si tin awor loke semper DIARIO a splica cu mester tin, un reserva cu sigur den e situacion mundial actual y exigencianan enorme cu gobernacion ta exigi, por cubri cualkier necesidad di urgencia.
Cuarenta aña pasa ora Betico Croes na nomber di Aruba a exigi un moneda propio y un Banco Central propio pa Aruba, el a confronta oposicion den Reino.
Awe Gobierno Wever-Croes ta entrega e prueba pakico Aruba mester di su propio Florin y Banco Central pa asina Aruba por lucha pa bienestar financiero di e pais, na momento cu seguridad economico y financiero mundial ta basha abou den conflictonan internacional.
