WILLEMSTAD: Dialuna merdia, Wardacosta di Caribe Hulandes a detecta riba radar un boto sospechoso cu ta moviendo for di lama grandi rumbo pa e isla di Curaçao.
Ora cu a detecta esaki, Centro Operacional Maritimo (MOC) a laga un boto patruyero di Wardacosta sali rumbo pa e boto sospechoso aki.
Na nan yegada na e boto, a bin nota cu ta trata di un boto di piscador di Curaçao, y e oficialnan a duna nan ordo pa move rumbo pa e Pier di Wardacosta, y oficialnan a bay abordo pa vigila nan.
Ora cu a yega na Pier, tanto oficialnan di Wardacosta como tambe Aduana a bay abordo pa busca tur caminda. Asina a bin haya un total di 223 paki di droga bon scondi. Esaki ta contene cocaina y a pisa 260 kilo.
Pues un caminda riba lama grandi, e boto piscado aki a “topa” cu un otro boto of barco unda a haci e trans-shipment di droga aki.
Tur cuatro homber naci na Curaçao cu tabata abordo, a wordo deteni door di Polis. E droga a wordo confisca y despues a keda destrui.
