Lo reuni cu Formado pa bin cu algun idea pa yuda Aruba crea mas pilar economico

ORANJESTAD (AAN); Reunion cu Stakeholders y demas personanan cu ideanan inovativo, lo sigui siman venidero cu Formador y tambe futuro partner di coalicion.

   Uno di nan cu lo tin reunion ta Simon Waslander, kende ta cla pa mustra nan Portfolio di Inovacion pa Aruba.

   El a confirma cu siman venidero e lo tin un reunion cu Formador.  El a splica cu nan punto di bista ta cu Aruba ta mey-mey di e crisis di mas grandi den su historia.  Aki ta esencialmente importante, cu ademas di Turismo lo tin di crea otro pilar pa asina sostene e economia Arubiano.

   Simon Waslander tin un grado di Bsc den Geneeskunde obteni na Groningen, y tambe grado Msc Innovation Management obteni na Maastricht.

   E tin algun vision fenomenal cu por yuda Aruba crea diversificacion den pilar economico.

   DIARIO a haya sa, cu den e reunion cu Formado, e lo bay presenta su vision yama “Bienestar Social di Generacion Nobo”, cu ta culminacion di varios aña di trabao y contacto cu equiponan academico di elite reparti na varios pais, cada uno cu nan propio specialidad.

   E vision ta consisti di e siguiente elementonan:

• Usa tecnologia di 3D Printing pa construi casnan social cu ya ta ser haci posible pa e compania Weber Beamix y e team academico di TU Eindhoven.
• Asistencia Avanza di Salud cu sensornan di E-Health, Biostatistiek, analisis avanza di sanger, y creacion di algoritmo. Bao guia di academiconan di Leiden y Groningen.
• Agricultura di Generacion Nobo cu un greenhouse mas avanza di mundo, suministra door di e compania di Arabia Saudita, Red Sea Farms.
• Plataforma Educativo Digital gratis cu caracteristicanan hopi avanza suministra door di Google.
• Panelnan solar avanza cu sistemanan di Graphene-Battery di e compania Oxford PV y Tel Aviv University.
• Bin cu Car-Sharing Pool cu vehiculonan electrico coriendo autonomo riba caya, y aki lo kier inclui Center for Automotive Research y Union Europeo den esaki.
• Participacion di ciudadanonan cu analisis di inteligencia artificial door di e compania Argu di Hulanda, y AGI Laboratories di Merca.

   Segun Simon Waslander, nan lo encanta di atrae e companianan aki pa Aruba pa mehora directamente e calidad di bida di poblacion.  Cu e meta principal pa exporta e concepto aki pa henter mundo, y cu tempo esaki lo por converti su mes den un pilar importante di economia pa Aruba.

   Di un di e ideanan aki, DIARIO apenas algun tempo pasa a tuma nota di noticia cu e compania di Arabia Saudita, esta Red Sea Farms ta trahando riba Greenhouse cu ta funciona usando awa di lama, y cu nan a construi un Greenhouse di 2.000 meter cuadra den desierto na Medio Oriente cu ta bay produci Tomati fruta.

   Pues Tomati fruta den desierto, usando awa di lama!  Un idea hopi inovativo cu lo keda presenta na Gobierno otro siman.