Minister di Husticia Arthur Dowers:
ORANJESTAD (AAN) – Minister di Husticia mr. Arthur Dowers a referi den entrevista cu Matutino DIARIO na e tema di Instituto Coreccional KIA, y e mal condicion fisico di e edificio. E mandatario a bisa cu semper KIA tabata un reto, pasobra no tin suficiente hende pa traha y e condicion fisico di e edificio ta na werki.
Minister Dowers a señala cu e proyecto di camara cu a wordo haci den pasado y e team di intervencion den KIA, ta dos aspectonan aki ta hopi importante pa tene nan riba pia, como tambe un grupo di trahado hopi motiva y cu pasion pa nan trabao ainda, ta keda bin tur dia.
“Pero e situacion ainda ta hopi dificil y a pone den e presupuesto supletorio un miyon florin adicional, pa mira con por haci cierto ahuste pa hacie manehabel, pero e no ta algo facil”. Asina e dignatario a indica.
Dowers a menciona cu gobierno ta bay reinicia, pa di tantisimo biaha, e evaluacion pa traha un prizon nobo, y e ta spera cu den algun luna nan lo ta cla cu e proceso aki pa duna e stapnan pa cuminza cu e proyecto aki.
