Zoraida Conijn di Fundacion Luna:
ORANJESTAD (AAN): Den e dianan aki tabatin un incidente cu no ta prome biaha ta sosode cu cachonan di caya cu ta ataca un persona. Den pasado, tambe a yega di sosode cu algun cacho cu no ta wordo teni den cura, a ataca un turista Mericano cu tabata jog mainta tempran. Awo, un bes esaki esaki a sosode cu un turista di Korea.
Zoraida Conijn di Fundacion Luna ta wak e situacion aki asina: tin hende na Aruba no ta worry mas cu nan bestianan mas. Ta haya hopi cacho ariba caya. Nan no a nace ariba caya. Nan ta di cura di hende. E ley t’ey. Cacho den cura ley e ta, el a remarca.
E ta cuestiona ken ta zorg pa nan keda den cora y pa ora e cachonan ta sali y ataca un hende, un cabrito of un mucha. Unda e boet ta of e castigo? Ta yama polis y polis ta bisa cu nan no por haci mucho cos y e ta compronde esey. E parti di boet no tin ningun siguimento of hende toch no ta hayando e boet. No tin consecuencia, el a remarca.
Poco dia pasa tambe por a tuma nota di mas y mas cacho y nan puppies cu ta wordo gedump. Tin esfuersonan y iniciativanan pa loke ta e parti di sterilisacion pero sinembargo, e cantidad di bestinan riba caya ta keda subi.
Conijn a declara cu e motibo di esaki ta pasobra e hendenan no ta echt reaccionando manera mester. Tin tanto campaña andando pa sterilisa bo bestia por nada. Excuus no tey mas, el a subraya.
Pero toch por wak cu hende no ta operando nan mascota. Nan ta haya te ora e mama haya puppies. “Anos no tin luga pa mas. Mi tin 140 cacho akiriba. E ta bahando pero slowmotion”.
Mester opera un cacho of un pushi prome cu e cay na estado. Cu 6 luna di edad por oper’e por nada. Pero e hendenan ta warda te ora e cacho haya su puppies y ta bay benta nan den mondi, el a expresa.
Consecuencia di esaki ta cu e cachonan si nan ta sobrevivi den mondi comiendo kico cu ta, na dado momento nan ta bay ataca e cabrito y e carne pasobra nan ta hambra. Eynan e problema ta cuminsa, Zoraida Conijn a indica.
