Minister Wendrick Cicilia
ORANJESTAD (AAN): Un accident recien a socede cu un speedboat di Watersport lastrando algun floats, di cual uno cu varios persona riba dje a bay dal cu impacto fuerte contra un Catamaran cu tabata ancra. E noticia aki a keda pasa varios siman na canalnan di TV na Miami. Pasobra un Lifeguard di eynan (di vakantie na e isla), ta esun cu a core bula den lama na Aruba pa rescata esnan cu a bay fo’i tino, y esnan cu a fractura weso.
Minister di Turismo, Wendrick Cicilia, a enfatisa cu e control maritimo riba e sector di watersport na Aruba lo wordo intensifica. Tur instancia envolvi den siguridad maritimo, entre otro Directie Scheepvaart, Guarda Nos Costa y autoridadnan maritimo, ta realizando controlnan na e diferente luganan unda actividadnan di watersport ta tuma luga.
E minister a indica cu, como parti di e maneho actual, Directie Scheepvaart lo tin un rol mas activo den supervision y control di e operadornan di watersport. Segun Cicilia, e intencion no ta pa pone e sector den un luz negativo, sino pa stimula cumplimento cu e reglanan y pa conscientisa e propietarionan di permiso di nan responsabilidad pa cu nan personal y clientenan.
“Nos kier stimula un conducta responsabel na momento cu hende ta subi lama, pasobra aki nos ta papia di bida humano. Nos no kier pa ripiti loke a sosode na 2022, ora un turista a perde su bida tragicamente, algo cu tambe a pone Aruba den un luz negativo. Nos kier evita cu algo asina por bolbe sosode,” e minister a declara.
Cicilia a enfatisa cu, den un sector unda siguridad mester semper ta prioridad, prevencion ta esencial. Pa e motibo ey, e Gobierno lo sigui aumenta control y supervision, cu e meta di eleva e nivel di responsabilidad entre operadornan y garantisa cu tanto residentenan como bishitantenan por disfruta di actividadnan di watersport den un ambiente mas sigur.
Segun e minister, un sector di watersport sigur y bon regula no solamente ta proteha bida humano, sino tambe ta contribui na e calidad y reputacion di Aruba como un destinacion turistico confiabel.
