Comandantenan nobo pa unidadnan militar di Aruba y di Corsou

ORANJESTAD (AAN): Dos Comandante nobo pa ARUMIL y CURMIL a keda instala oficialmente durante ceremonianan di cambio di mando na Aruba y Corsou.

 Majoor Glenn Werleman a worde nombra como Comandante di e unidad Arubano (ARUMIL), y Majoor Ryan Cabenda como Comandante di e unidad Curasoleño (CURMIL). E nombramentonan aki ta marca un paso significante den e profesionalizacion continuo di ambos unidad.

   Ambos Comandante ta trece experiencia militar amplio y ta posee conocemento profundo di e region. Majoor Werleman ta asocia cu ARUMIL ya for di 1997. Durante su carera, el a ocupa varios posicion den seno di ARUMIL, Wardacosta, y Cuerpo di Marina. Te cu recientemente, el a fungi como ayudante di Gobernador di Corsou.

   Majoor Cabenda a cuminsa su carera na 2004 cu CURMIL (e tempo ey conoci como ANTMIL). El a construi amplio experiencia cu Wardacosta y a fungi como adyudant di Gobernador di Corsou, for di 2011 pa 2015.

   Continuidad y profesionalisacion: E traspaso di mando ta tuma luga na un momento crucial. Ambos unidad ta den desaroyo significante actualmente. E enfoke aki ta, halsa e normanan operacional y sigui profesionalisa e personal militar. Cu e yegada di e oficialnan experiencia, e fundeshi ta keda pone pa un futuro fuerte.

    Manera ta conoci, e Militarnan Arubano (ARUMIL) y e Militarnan Curasoleño (CURMIL) ta unidadnan di infanteria liviano operacional. Nan ta opera bao di mando di Comandante di Forsanan Naval Hulandes den Caribe (CZMCARIB). Aunke e unidadnan ta ambtenaarnan emplea pa e paisnan di Aruba y Corsou, nan ta wordo contrata riba termino na CZMCARIB pa contribui na e siguridad regional. Ambos unidad ta completamente desplegabel pa e tres tareanan principal di Forzanan Arma den Region Caribe, variando di siguridad regional te na sosten durante incidentenan local.