Minister di Turismo Wendrick Cicilia:
- Tambe pa por garantisa orden riba lama
ORANJESTAD (AAN): Siman pasa, tur instancia concerni, (Bureau Guarda Nos Costa, (GNC) Departamento di Inspeccion di Nabegacion Aruba (Directie Scheepvaart, DSA), Maritieme Politie, Strandpolitie) hunto cu Minister di Turismo, Wendrick Cicilia a reuni pa ampliamente delibera riba e siguridad maritimo. A base di e incidente fatal riba lama na aña 2022, unda un hoben turista a perde su bida, a crea un lista di recomendacion pa mehora e siguridad maritimo.
Minister Cicilia a remarca cu Aruba ta conoci como un isla sigur tanto riba tera como riba lama. Actividadnan acuatico ta hopi popular bou di nos turistanan. E actividadnan aki ta sosode tur dia riba nos beachnan. Y segun e minister, e operadornan di e actividadnan acuatico aki tambe ta responsabel parcialmente pa e siguridad di nos bishitantenan.
E minister a duna di conoce cu e lista di recomendacion ta inclui comportacion responsabel riba lama di e watersport na su clientenan, ekiponan di siguridad na ordo, y mester ta sobrio, bou niun influencia di alcohol y droga, na momento cu atende cu cliente. E recomendacionnan ta bin cu maneho, unda cu por perde licencia pa sigui opera.
“Tur esakinan mester wordo controla. Y na Aruba nos tin reto riba e asunto di controle. P’esey Gobierno kier a sinta na mesa pa intensiva e control y garantisa cu tin orden. Y den e cuadro aki nos a identifica diferente aspecto cu tin mester mehoramento”, Minister Cicilia a expresa.
El a remarca cu for di e reunion, a conclui cu lo institui un plataforma di siguridad maritimo. Segun e, actualmente no tin comunicacion structural entre e instancianan concerni. Pa medio di e plataforma lo establece comunicacion hopi mas estrecho entre e instancianan cu ta encarga cu siguridad maritimo na unda cu lo tin mas controle, lo comparti informacion miho cu otro, specialmente na momento cu identifica un hecho unda cu watersportsnan no ta cumpli cu cierto regla, norma y regulacionnan.
Di e manera aki tambe, el a agrega, tur e instancianan aki lo traha hunto, y lo tin mas control, y lo bin sancionnan pa e watersportsnan cu no ta cumpli y cu ta pone siguridad maritimo na peliger door di conducta iresponsabel riba lama.
