ORANJESTAD (AAN): Desde 2019 131 a incorpora un Conseho Hubenil den e organizacion.
E Conseho Hubenil di 131 su tarea ta pa primeramente duna conseho solicita y no solicita na e organizacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organizacion un bista cu precision di kico ta tumando lugar bao di mucha y hoben y pakico.
E Conseho Hubenil ta consisti di 3 hoben, mucha muhe y mucha homber, entre e edad nan di 11 pa 24 aña. E personal di 131 ta den contacto estrecho cu e Conseho Hubenil pa asina aki por scucha kico segun nan ta e preocupacionan y problemanan bao di nos muchanan y hobennan.
Tambe e Conseho Hubenil ta ricibi diferente training for di 131 pa asina aki nan tin mas conocemento tocante diferente sector y asina ekipanan mihor. Pa dunanan mas conocemento di e sector social, educacion y husticia, tambe ta organiza diferente bishita na instantcianan pa nan.
Riba 31 di augustus ultimo e Conseho Hubenil a haci un bishita na Departamento di Asuntonan Social. Intencion di e bishita tabata pa e Conseho Hubenil di 131 por a haya un bista di kico e trabao di Departamento di Asuntonan Social ta encera. Tur e seccionan y e servicionan cu e seccionan ta brinda na e comunidad di Aruba.
E Conseho Hubenil di 131 a ricibi e informacion y rondleiding for di Marceylaine Paskel, ‘Informatie en communicatie Medewerker’. Primeramente a duna e Conseho Hubenil di 131 un presentacion tocante e seccionan y e servicionan cu e seccionan ta brinda. Despues e Conseho Hubenil di 131 a ricibi un rondleiding den e edificio di Departamento di Asuntonan Social.
E Conseho Hubenil di 131 a keda masha contento di por a ricibi informacion tocante Departamento di Asuntonan Social. 131 y e Conseho Hubenil di 131 kier a gradici Departamento di Asuntonan Social pa ricibi nos y pa e informacion comparti.
E Conseho Hubenil di 131 por ser incorpora den 131 danki na sosten di Setar N.V, Aruba Airport Authority N.V., The Salamander Group, ASTEC N.V. y AHATA.
