Lider Sindical di Sindicatonan Uni, Hose Figaroa:
ORANJESTAD (AAN) E Lider Sindical di Sindicatonan Uni, mr. Hose Figaroa, a splica den entrevista cu Matutino DIARIO, cu tin un concepto di HOFA cu a wordo entrega na Conseho di Ministro di Hulanda, pues, no t’asina cu no tin nada.
“Si tin un concepto cu a wordo entrega no mas cu e consehonan cu a wordo duna riba e concepto aki, nos a bin compronde cu tin cierto cambionan cu ta wordo discuti. Sinembargo, nos ta bisa cu pa nos e hecho cu nos ta encamina e rumbo di un rijkswet mes no ta na su lugar, tampoco e hecho cu ta wordo bisa cu no mester preocupa pasobra toch tin un landsverordening cu mester wordo aproba aki na Aruba, mi ta kere cu esey ta desvia un tiki di e punto cu nos ta pone; pasobra e rijkswet ta riba su mes, lamentablemente nos no tin mucho di bisa, como pais, riba esaki.
Fuera di e hecho cu nos a bisa cu no tin consensus mas, y cu e proceso tin cu para, y esey ta loke nos ta boga p’e”, Hose Figaroa a remarca. El sigui bisa cu e concepto nan tey, tanto di e Rijkswet como e Landsverordening, no mas cu tin consehonan nobo cu a sali cu, supuestamente, lo hiba na cierto cambionan pero, no ta conoci kico e cambionan aki ta.
“Na nos parecer ningun cambio ta necesario, ta djis regula esaki na un forma cu ta pafo di e rijkswet y riba esey nos kier combersa cu Gobierno”, mr. Figaroa a agrega.
Sindicatonan Uni ta spera cu lo haya audiencia di Gobierno. Nan ta kere cu esaki ta parti di e seriedad di goberna un pais, cu ta pone stress riba dialogo, pasobra reuni tambe ta un forma di dialoga, di papia y scucha, den e caso aki, e punto di bista di e sector sindical. “Pero, di otro banda, si nos no haya oido di gobierno mi ta kere cu e proximo caminda pa bati na porta lo ta, atrobe, na e poder maximo cu tin na Aruba, cu ta Parlamento.
En todo caso, ultimo biaha cu nos a sinta cu Parlamento a bisa cu nan ta pendiente kico e consehohan di tanto Raad van Advies cu Raad van Staten lo ta, y mientras tanto nan ta conoci, kizas lo ta interesante pa intercambia di pensamento cu Parlamento e ora ey, y con leu e consehonan aki a cambia nan forma di mira e situacion pero prome cu esaki nos kier combersa cu Gobierno cu ta esun cu a sinta na mesa cu Hulanda”, mr. Hose Figaroa, lider sindical, a declara.
