Lo desaroya e proyecto “Strategic Capacity Building Plan”

Fundacion Rancho cu dinamica nobo 2022-2026:

ORANJESTAD (AAN) – Stichting Rancho a yama un conferencia di prensa, Diahuebs 6 di Januari, den cual den nomber di e fundacion, señor Clifford Rosa a hiba palabra. Den e conferencia di prensa aki, director di Fundacion Rancho a anuncia su proyecto “Strategic Capacity Building Plan”.

Acercando 12 Aniversario:

Como Fundacion, tur aña riba 6 di Januari, nan ta prepara pa inicia un temporada nobo, y nan ta kere cu riba Dia di Tres Rey, ta un bon fecha pa e directiva tin su prome reunion anual. Yegando ya, na e 12 aña di existencia di Fundacion Rancho, esaki ta un tradicion, segun Clifford Rosa.

Na e ocacion aki nan a haci esaki un tiki mas special, pa anuncia un proyecto-programa, cu a wordo crea durante e ultimo seis lunanan, danki na fondonan di Fundacion “Samenwerkende Fondsen Cariben” y tambe sigur na CEDEAruba, di cual por a logra yega na fondonan necesario pa e proyecto aki, y esaki a yega na conocemento di e fundacion na December ultimo.

Rosa a comenta cu hopi biaha e fundacion ta wordo puntra con nan a sobrebibi e pandemia, y esaki ta algo hopi duro y dificil, mirando tambe cu nan mester a muda di un lugar pa otro. No obstante, Clifford Rosa a expresa cu e fundacion ta hopi contento den nan centro di actividad nobo, situa na Visstraat. 

DINAMICA NOBO:

Tocante e proyecto,  Clifford Rosa a bisa cu e ta bao di e nomber “Strategic Capacity Building Plan” y ta bay mas na idioma Ingles pa asina ey presenta un proyecto internacional.

Fundacion Rancho lo celebra su di 12 aña di existencia, pero tambe e actividadnan y proyectonan lo wordo miho structura y como fundacion, nan mes tabata tin mester di un “capacity building” locual a crea cu nan tin cambio di structura di e directiva, lo bay tin cambionan di structura den e organizacion mes pa e bira mas comercial. Rosa a bisa esaki cu acento, pasobra nan ta bay enfoca mas riba e parti cultural, pero si no tin fondo e fundacion mes ta bay crea e recursonan financiero.

El a declara cu esaki ta bay ta e dinamica nobo di 2022 pa 2026, di cual nan ta bay pone e rapport den funcion, y asina ey crea un Fundacion Rancho hopi mas stabil y sostenible, pa e trabaonan cu nan a bin ta haciendo y cu lo sigui haci, pa duna comunidad su capacitacion tambe den su herencia. Asina Clifford Rosa a bisa.

El a reitera cu cultura ta un di temanan riba cual lo enfoca, pero un bez cu e rapport lo ta poni riba e website di Stichting Rancho, eynan esnan cu lese por bay den detaye, y e ta spera cu comunidad lo por bin cu comentario, pregunta y sugerencianan, locual cu mester mirando cu Fundacion Rancho mester di comunidad pa ehecuta e proyecto aki, segun Clifford Rosa.