Shurman Milliard, di FTPH:
Shurman Milliard, Trahado Social na Fundacion Telefon pa Hubentud (FTPH) 131, den un entrevista a menciona cu durante e 26 añanan di existencia di e fundacion nan a desaroya diferente proyecto riba temanan di termento, norma y balor, presion di grupo, entre hopi otro diferente tema.
“Pero ora nos ta analiza tur e topiconan aki, un problema cu ta bin dilanti ta comunicacion. Si nos no ta papia con nos ta wak otro, con nos ta sinti cu nos mes den e momento cu nos ta sinti algo cu no ta adecua, of nos no ta cumpli cu diferente palabra y pensamentonan, nos mester por desaroya esaki na un bon manera cu nos hoben pero tambe entre otro, manera mayornan, maestronan, y otro profesionalnan”, Shurman a relata.
El a agrega cu nan por wak cu na 131 e hobennan tin un problema pa expresa nan mes riba un bon manera.
“Pasobra bo por expresa bo mes na mal manera of cu palabranan cu otro hende no ta compronde, of no ta haya suficiente informacion, y pesey nos ta purba pone mas enfasis riba esey, via dos diferente proyecto:
un ta “Ta ken mi ta?” Aki nos ta papia riba “ken bo ta”, “Kico bo kier”, “Kico ta bo deseonan” “Kico ta bo rolnan pa bo”, “Kico bo kier ora bo ta mas grandi”, “Con bo ta wak bo ambiente rond di bo?”
Y, den e di dos parti di e tayer di trabao aki ta e Dinamica di Grupo, na unda bo ta para den e grupo ey, na unda bo ta para den bo caya, por ehemplo, na momento cu bo ta bibando na un lugar, cual rol bo tin dentro di bo comunidad chikito, den bo vecindario y den bo scol.
Y na momento cu bo sa esey, y cu otro hende ta wak bo, como un lider, un hende importante, of un parti cu ta balora e pensamento di bo habitat, esey tambe ta yuda bo den futuro. Esey nos kier pa nos hobennan por mehora. Y banda di esey nos tin otro tayer di trabao yama ‘I got a feeling” cual ta papia solamente di sentimento. Kico ta ser contento, kico ta ser rabia, pakico nos curpa, nos sistema tin sentimento mes. Ora bo ta papia di sentimento ta pa proteha nos den situacionnan cu a sosode den pasado y cu por ripiti den futuro.
“Eigenlijk nos emocionnan ta proteha nos di traumas y trauma ta proteha bo contra peliger”, Shurman Milliard a relata. El a expresa cu tur sentimento tin un motibo. E Fundacion ta wak e aspectonan negativo den e diferente charlnan y pesey nan kier pone enfasis riba e temanan aki y tambe riba e tema di automutilacion cu ainda ta sosode den nos comunidad chikito, segun Milliard a subraya.
Tambe lo bin cu un tayer yama “Expresa bo mes” y den otro articulo lo elabora tocante esaki.
