ORANJESTAD (AAN): Diahuebs venidero, esta 3 di Juni, lo bay tin pa 7:00 pm, e tan spera Debate 2021, unda tur 12 lider politico lo ta dilanti mic pa asina contesta y debati riba asuntonan.
Ya caba den edicion anterior, DIARIO a bin cu tur detaye di loke lo bay ta diferente den e debatenan aki pa 2021, e formato, e oportunidad pa publico tin interaccion, y e forma cu tin biaha ta 3 politico ta haya chens di reacciona riba un pregunta, y tin biaha tambe ta 2 politico ta haya chens.
Yolanda Richardson ta bay ta moderador di e debate, como cu na Universidad di Aruba e ta duna les den debate y sa hopi di e materia.
E anochi lo cuminza cu un Antesala pa papia di loke por spera di e anochi. Na final di e debate tambe, lo tin mey ora di analisis y conclusion.
Segun Martijn Balkestein cu ta den e Comision Organizador, a bisa cu despues di e prome debate, ta evalua kico tabata e puntonan exitoso, y kizas haci cambio na algun di e puntonan ey.
Aki ta unda cu Balkestein a subraya, cu e di dos debate di 17 di Juni lo no ta mescos cu esun prome, y posiblemente lo bin cu un otro formato. Toch nan ta keda habri pa cualkier sugerencia di organizacionnan local y ciudadanonan cu por duna nan un bista riba kico kizas tin di cambia.
MINUUT PA CONTESTA:
E pregunta a wordo haci na Balkestein, si acaso 1 minuut di tempo ta suficiente pa un politico duna su contesta riba e materianan. El a bisa cu depende con complica e pregunta ta, lo por duna sea 1 of 2 minuut di tempo pa contesta.
Pero si acaso e lider politico ta agil y suficiente na altura di e topico, e por duna un contesta cu ta indica den cua direccion bo ta kere e pais tin di bay. No ta intencion pa e lider bay den detaye, pero por lo menos e mester tin su ideanan caba.
E ta pensa cu e preguntanan cu nan tin, lo no ta nada complica, y ta temanan cu ta relaciona cu pais Aruba, y cada lider politico mester tin e conocemento caba pa duna un contesta rapido riba e pregunta. E ta un reto, pero e posibilidad tey pa un lider politico duna contesta den minimo di tempo.
