ORANJESTAD (AAN) – Diabierna 28 di Mei aki, a tuma lugar, na Cas Sjabururi, e 'Kick-Off' of empuhe inicial di Aruba Doet 2021,
den presencia di Gobernador Boekhoudt, Fundacion Movemiento ta Bida y su grupo “Hunto grandi, grandi Hunto”, boluntarionan di Cas Sjabururi, y e mascota “Doeti”.
Daniel Tecklenborg, director di Cede Aruba, a hiba palabra, cuminzando pa recorda cu na 2020 mester a postpone Doet, pa motibo di e pandemia di Covid-19, y hopi cos a wordo limita durante e siguiente tempo.
“Mi ta hopi contento cu e aña aki si, nos tin e oportunidad di organiza Aruba Doet den su forma cu mester ta. Naturalmente, cu limitacionnan ainda, pero cu hopi boluntario y hopi proyecto.
Trabao boluntario ta trece satisfaccion, conexion y balornan hopi importante pa nos comunidad. Hopi importante cu Aruba Doet ta cu nos ta traha duro, pero nos ta pasa bon tambe y logra hopi proyecto. Pesey nos lema ‘Haci bon y pasa bon’. Nos tin dos dia unda cu hopi proyecto lo tuma lugar. Nos tin en total 167 proyecto cu lo wordo haci cu un total di 2.700 boluntario. 75% di e proyectonan di Cede Aruba ta di Aruba Doet: mantenimento, verf, drecha cos, anto yuda nos organizacionnan bay un stap dilanti. Hopi organizacion durante covid-19 tambe a sufri extra y nan mes mester di un ayudo extra e aña aki”, Tecklenborg a menciona.
Director di Cede Aruba a splica cu 20% di nan proyectonan tin di haber cu agricultura, cu ta hopi importante tambe pa Aruba na e momentonan aki, manera traha greenhouse, planta mata, manera nan ta haci den Cas Sjabururi cu e boluntarionan. Tambe nan tin 5% di actividadnan social, cu na e momentonan aki ta mas dificil, pero e ta contento cu tin esaki tambe den e programa.
El a agrega cu 30% di e organizacionnan cu ta participa ta scolnan y centronan di cuido den dia. 15% ta clubnan deportivo, 50% ta fundacion “All Over Aruba” y 5% Centro di Bario.
Daniel Tecklenborg a menciona algun di e proyectonan ta bay wordo realiza, manera Tayer pa 60 plussers, pa siña aspectonan tecnico di con pa anda cu celular, internet, cu ta hopi importante pa e grupo aki, y sigur den tempo di Covid.
Tin tambe un proyecto pa hoben pa cuida e cuebanan di Aruba, y tin otro proyecto pa stimula personanan cu limitacion di bista of ciego, pa experiencia kayak y tambe seaplane pa hendenan cu limitacion.
Daniel Tecklenborg a gradici tur e boluntarionan pero tambe e companianan cu a contribui cu Aruba Doet e aña aki, cu ta hopi y cu tin Aruba na pecho. Tambe a gradici DOW cu a yuda nan cu e promocion cu por mira rond di Aruba, y cu ta na interes di Land Aruba.
