Rino Hermans di Bureau BRA
ORANJESTAD (AAN): Diahuebs awor pa 10:00 am, lo tin e simulacro anual di Tsunami na Aruba, yama ‘Carib Wave 2023’, y ta wordo organiza bao auspicio di UNESCO. Tur pais den Caribe lo haci uso di esaki pa asina mira con bon prepara nan ta pa un berdadero Tsunami.
Diahuebs awor, lo haci comosifuera e volcan Mount Pelée na Martinique a ocasiona un Tsunami, cual dentro di 1 ora y 20 minuut lo yega costanan di Aruba.
Rino Hermans di Bureau Rampenbestrijding Aruba (BRA) a splica cu tin di corda cu Tsunami ta un ola di energia, y no un ola di biento. Un ola di biento ta dal na costa y bay bek. Pero un ola di energia ta keda pusha te ora e yega na cero y e ta calma.
Si acaso un Tsunami dal na Aruba for di panort, e lo bay dal e isla den un asina yama ‘Corner Wave’, cu ta bira rond di Aruba y ‘bin bek aden’.
Segun Hermans, e filosofia cu e ta bay costa di Venezuela y bons bin bek, por socede solamente cu ola di biento. Esey lo no socede cu ola di energia, pues un tsunami.
E ola di Tsunami rond mundo ta subi tera como cu e energia den dje ta sigui pusha te ora cu e yega na cero, y e ora e ta bay bek lama.
Pues na Aruba, no subestima cu e lo dal costa panort so. E prome impacto lo no ta grandi, pero si nos hendenan no ta prepara, ora cu e Tsunami tuma e ‘corner wave’ na Baby Beach, Rodgers Beach y tambe Arashi, e lo lastra tur hende y material cu e haya den su caminda y pusha bay aden.
Tsunami ta un preocupacion grandi, pasobra bo no sa ki ora e ta presenta su mes. E preocupacion aki a forza Nacionnan Uni pone UNESCO keda encarga un biaha mas cu e simulacro di Carib Wave 2023, pa prepara e islanan den Caribe pa mira nan capacidad pa deal cu e situacion aki.
