Linguista Todd Dandaré a destaca rikesa cultural y linguistico di Caribe

Na Praia, Cabo Verde

ORANJESTAD (AAN): Durante e dianan 27 27, 28 y 29 di Mei, e linguista y Papiamentista Riohachero/Arubiano, Ramon Todd Dandaré a participa y atende pa medio di un invitacion formula dor di Presidencia di Cabo Verde, un conferencia: Encontro Internacional da Crioulidade Atlântica na Praia, ciudad capital di e pais Africano aki. Un conferencia cu a conta cu presencia di Presidente di e Republica di Cabo Verde y otro personahenan importante di e sector politico, enseñansa, cultura y arte di multiple teritorio continental y insular di mundo. 

Todd Dandaré a trece su disertacion den cuadro di un panel di experto na Universidad de Cabo Verde, unda el a representa tanto Aruba como La Guajira. E tabata un escenario ideal di debate academico, unda e linguista a destaca y duna prioridad na e rikesa tanto cultural como linguistico di e gran Caribe, unda ta existi un variedad di lenga Amerindia y creole.  Lenganan cu ta merece di wordo cuida, papia, conserva y protegi na fabor di e desaroyo di e pueblonan.  Pero tambe el a haci un aplelacion pa rescata e tradicion oral, y defende e memoria colectivo. 

Ta asina cu e ciudad di Praia a bira un espacio ideal y interesante pa bin cu un debate internacional relaciona cu e tematica di e diaspora, diversidad cultural, educacion y identidad, unda e linguista Todd Dandaré a probecha pa introduci e Revista SER Caribe, ya cu e ta miembro honorario di e Conseho Editorial di e media aki.  Dia 2 di Mei ultimo enconexion cu Dia di Guajiridad, Todd Dandaré a recibi un homenahe durante e asina yama: Encuentro Caribeño Colombo Neerlandes “Mma Pe´ipaasü” (E tera cu ta uni nos) cu a tuma luga na Riohacha, La Guajira, unda a wordo conmemora tambe 200 aña di relacion diplomatico entre Reino Hulandes y Colombia. E portada di e dos edicion di e revista aki -cu ta proyecto literario multicultural y multilingual- a wordo dedica na e linguista y Papiamentista. 

E gran anfitrion di e evento na Praia a bira e Presidente di Cabo Verde,  José María Neves. Mientras cu e Comite Cientifico a wordo presidi dor di e profesor, Augusta Teixeira. Entre otro obhetivonan e  “Encontro Internacional da Crioulidade Atlântica”,  a  percura pa stimula e dialogo rond di e influencianan cultural produci dor di intercambio historico entre pueblonan, situa na Cabo Verde y nan identidad, movilidad Atlantico y  convivencia multicultural.