Ling & Sons cu lanzamento exitoso di ‘Hendrickx the Baker’

Hopi hende presente na e apertura

ORANJESTAD (AAN): E gran dia a yega riba Diasabra 10 di September!  DIARIO a nota cu ta hopi hende mes a acudi na Ling and Sons Food Market, pasobra esey ta momento cu nan a lansa e concepto nobo di Hendrickx na e Panaderia.

   Hendrickx ta un concepto nobo y unico na Aruba, na unda nan ‘meesterbakker’ Hendrickx hunto cu su team di panaderonan, a integra diferente recetanan for di Hulanda, Belgica y Francia hunto y asina a crea un surtido exclusivo di pan y cos dushi, na unda diversidad y calidad ta na prome luga.

   A ser splica na DIARIO, cu e productonan ta bin di e miho recetanan autentico, 100% natural y artisanal di Europa, traha cu e mihor ingredientenan (sour dough), sostenibel y horna na un manera unico. Hendrickx ta conoci pa trece productonan di calidad halto y cu un sabor extraordinario.

   E lanzamento tabata un exito cu bon comentario di clientenan cu a pasa disfruta di e Panaderia nobo di Ling & Sons Food Market. Ling & Sons tabata tin musica acustico den e supermercado y diferente tastings di e pan y cos dushi di Hendrickx de Bakker. Ademas di esaki, ‘meesterbakker’ Hendrickx mes tabata presente pa splica mas over di e variedad grandi di pan y cos dushi cu a worde introduci na Ling & Sons Food Market.

   Pa celebra e apertura Ling & Sons tin ful suman diferente ofertanan special na e departamento di Panaderia. Pa mas informacion di e specials por follow e supermercado via rednan social of bishita shop.lingandsons.com

   E Panaderia di Ling & Sons Food Market ta habri tur dia mesun horario cu e supermercado di Dialuna pa Diasabra di 7:30 am pa 8:00 pm, y tur Diadomingo di 9:00 am pa 3:00 pm.