Lina Orman a desaroya un bunita proyecto di obra di man pa personanan 60 plus

ORANJESTAD (AAN):  Señora Lina Orman, den entrevista cu DIARIO, a elabora tocante un proyecto di obra di man cu el a desaroya, pa personanan 60 plus, di e grupo “Hunto Grandi,  Grandi Hunto” di Movimento ta Bida. 

Lina a duna di conoce cu e proyecto tabata hopi bon, e grandinan ta sumamente creativo cu nan man, y nan a haci esaki den e transcurso di 12 siman.

   Locual nan a traha a worde poni den exposicion. Nan a traha nan obranan di man di diferente material, por ehemplo paña, palo, flor, entre otro. E proyecto aki no tin un fin comercial; su meta  ta pa mustra cu e hendenan 60 plus no ta keda sinta na cas por nada, pero e grandinan aki, di 60 te 80 aña, tin hopi creatividad.

   Señora Orman awo ta bay tuma un descanso, pero e tin otro proyecto cu e grandinan kier pa cuminza na Januari 2022 caba, pero esey e tin cu evalua hunto cu e Fundacion Movimento ta Bida y Hunto Grandi, Grandi Hunto, pa wak kico nan ta bay haci pa otro aña, pero si por, nan ta sigui pasobra e grandinan kier mas.  Aworaki e 32 gruponan di grandi cu tin na Aruba ta para, señora Orman a bisa. El a comenta cu aña aki nan a bin hunto, riba tur Diasabra y ta keda pendiente kico lo sosode na 2022.