ORANJESTAD (AAN): CEO di Oficina di Turismo, Ronella Croes a indica dialuna durante e conferencia di prensa riba
e ultimo desaroyonan di Covid-19 el a agrega algun decision mas cu a ser tuma siman pasa banda di locual a wordo treci dilanti caba den otro articulo.
El a señala cu esaki ta regarda na e parti di cantidad di hende na mesa. Esaki ta un medida cu ta sigui suavisa pa loke ta e sector di HORECA.
Croes a bisa cu locual ta permiti ta 8 persona na mesa paden y 10 persona na mesa pafo. Esaki ta un di e cambionan tambe cu ta tuma lugar.
Un otro cambio cu hopi hende por ta no a realisa ta cu awor hende por sinta na bar bek. Por haci esey mirando cu ta permiti diferente cantidad di hende mas amplio na mesa. Pesey a tuma e decision ey teniendo cuenta tambe cu e distancia di 1,5 meter rekeri, a remarca.
Tambe un otro aspecto cu ta regarda mundo di HORECA ta cu e limitacion pa musiconan of pa esnan cu ta entretene di un of otro manera ta wordo kita. No ta bay tin limitacion mas pa loke ta trata e cantidad di hende cu lo por ta riba stage, por ehempel, den forma di un banda.
Esaki ta un cambio hopi importante tambe y cu ta sigui den linea cu e suavisacion di e medidanan y cu na su turno ta mara na e grado di vacunacion y e casonan positivo di Covid-19 na Aruba cu ta mirando cu ta menos, Ronella Croes di ATA a declara
