ORANJESTAD (AAN): Despues di a wordo presenta na Museo Arqueologico Nacional Aruba, awor e bon noticia ta cu e Expo titula ‘Lasonan Caribeño’ por wordo mira na Biblioteca San Nicolas tambe.
Esey ta loke Marguerita Wever a confirma na DIARIO.
Prome cu e Expo aki a yega Aruba, nan tabatin deseo pa esaki yega mas cerca di comunidad, door di pone e exhibicion tanto na Playa y tambe na San Nicolas. E ta un exposicion cu por wordo traslada facilmente, y ta contento cu Biblioteca Nacional San Nicolas a duna OK pa e wordo poni eynan.
Cu e Expo na San Nicolas, e “Lasonan Caribeño” ta yega aun mas cerca di comunidad. E espacio na Biblioteca SN ta hopi bunita y ta un lugar unda tin hopi hende ta bishita pa bay servicio di Biblioteca. Tin cu ta bay eynan special pa haci nan estudio of proyecto pa scol.
Museo Arqueologico Nacional Aruba ta acercando varios scol na San Nicolas tambe, pa mira si nan ta interesa pa bishita e Expo, y cu cita haci adelanta, nan lo ricibi alavez un guia cu lo duna e alumnonan extra informacion y guia riba Diamars, Diaranson, y Diahuebs. Pero tin di cumpli cu tur protocol y regla sanitario den cuadro di Covid-19 pa evita aglomeracion. Ta tuma solamente 1 klas of 1 grupo cada biaha. Tin di yama 582-8979 di antemano pa asina ricibi sea un scol, traimerdia, creche, of vakantiecamp cu tin planeando.
Wever a indica cu e Expo ta keda habri na Biblioteca San Nicolas pa como 3 luna.
E Expo aki di “Lasonan Caribeño” ta relata e storia di Caribe prome cu Columbus a yega na 1492. E proyecto di investigacion aki Nexus 1492, bao guia di Universidad di Leiden na Hulanda, a conclui cu e habitantenan indigeno di Caribe a sufri hopi cu yegada di Europeonan, pero cu nan cultura toch ta sigui biba na diferente forma.
Den Caribe, por mira e Expo di Lasonan Caribeño na diferente pais caba! Tin ‘Lazos Caribeños” na Republica Dominicana, Puerto Rico, y Cuba. Tambe tin “Liens Caribéens na Haiti, Guadeloupe, y Martinique.
Tambe tin Caribbean Ties na St. Eustatius, Dominica, Grenada, Hulanda, Suriname, Barbados, y Saba.
E proyecto di Lasonan Caribeño a dura 6 aña pa keda cla cu tur informacion, y a wordo conta for di e punto di bista di indigenonan di Caribe, y no for di punto di bista Europeo.
Tur loke a siña na scol den bukinan ta for di punto di bista di Europeonan. Pero e Expo aki ta bin cu informacion di e islanan mes, y di e indiannan mes cu tabata biba riba diferente isla den Caribe. Aki bo por mira e diferencia- y e similaridadnan cu nan tabatin cu nos na Aruba, y cu awendia ainda nos tin un herencia comparti. Pues un herencia cu tin na Aruba, pero tambe otro islanan den Caribe.
Por ehemplo den cushinamento di cuminda crioyo, bo ta haya cierto similaridad- y cierto tradicionnan tambe. Esaki ta algo cu ta wordo enfoca riba dje tambe den e Expo aki.
Tambe tin Expo di diferente potchi cu tin mesun funcion, pero toch a wordo traha na e forma y tradicion cu indiannan di diferente isla tabata crea nan. E ta bunita pa mira esey, y ta duna informacion valioso. Bo ta mira cu aki na Aruba nos no ta para riba nos mes, pero ta forma parti di algo mas grandi.
E indiannan cu a bin Aruba, algun di nan a bay na otro islanan. Aki bo ta mira pues cu nos tin herencia cultural comparti cu otro islanan.
Pa bo mira e Expo aki, e no ta mara na edad. Pero ora cu bo tin guia pa grupo, muchanan lo haya tende storia conta pa un persona di Museo.
Un chens unico pa ciudadanonan di San Nicolas pa bay mira e Expo aki di Lasonan Caribeño cu ta habri durante e horarionan di operacion di Biblioteca San Nicolas y ta vale la pena pa bishite.
