ORANJESTAD (AAN): E parti di e crisis di salud ta domina na e momentonan aki, pero ainda mester para keto pa loke ta e crisis economico y financiero di e pais.
Asina Premier Evelyn Wever-Croes a indica dialuna atardi durante e conferencia di prensa unda a anuncia flexibilisacion di medidanan den cuadro di Covid-19.
E mandatario a señala cu berdad ta bayendo mihor, pero keto bay e realidad ta cu tin 4 mil persona ainda cu ta depende di FASE ya cu nan a perde nan trabao door di e pandemia y ainda no a haya un trabao.
Banda di esaki tin 14 mil persona cu ta depende di Subsidio di Salario. E personanan aki ta traha den un sector na Aruba cu a wordo afecta pa e pandemia y cu ainda mester di subsidio di salario pa por sigui wanta cabes riba awa, a expresa.
No mester lubida tambe cu 1 di cada 5 persona na Aruba ta depende di e pakete di cuminda di Cruz Cora cu awor ta bay pasa pa Gobierno y Fundacion pa Nos Comunidad.
Cu e cantidad di personanan aki cu ta depende di FASE, Subsidio di Salario y di e pakete di cuminda por mira cu e aspecto di salud ta bon bao di control, pero ainda ta depende hopi di sosten di likides financiero di Hulanda pa por cubri e necesidadnan aki, e mandatario a remarca.
Tin hopi pregunta tambe relaciona cu ki dia ta bay para e cortamento di salario. Wever-Croes a bisa cu esaki ta depende di e recuperacion economico.
E cortamento di salario tanto den sector publico como den sector semi publico ta depende di e recuperacion economico.
Berdad ta mira un recuperacion economico hopi interesante y si tur cos sigui asina ta bay yega pronto e momento cu e cortamento di salario tambe por wordo elimina sea completo of por ta den cierto stapnan of den fase.
No tin fecha exacto pa esaki, Wever-Croes a expresa, pero esaki tambe ta depende di e negociacionnan cu Hulanda mirando cu Hulanda a pone condicionnan cu ta 'tot nader order'.
Ya caba a inicia cu dialogo cu sindicatonan y lo sigui cu dialogonan cu esnan den sector semi publico pa mira con esaki por yega na un momento cu e trahadornan por wordo compensa completo, e mandatario a declara.
