Lilian Boekhoudt cu recuerdonan fenomenal di The Young Voices

Concierto grandi na November

• Maybeline a siña nan canta y siña nan bira un ciudadano corecto 

ORANJESTAD (AAN): Un show sumamente grandi ta wordo prepara, unda pueblo lo bay rebiba e momentonan agradabel di decada di 1970 y 1980, cu e famoso grupo di cantante hubenil di e epoca ey.  Ta trata aki di e presentacion di “The Young Voices: The Reunion” unda casi tur esnan cu a participa den e grupo musical aki lo subi escenario y canta bek tur e cancionnan cu a haci nan famoso, y alavez haci esaki un homenahe special dedica na e gran maestra Maybeline Arends-Croes.  E tabata e motor tras di e grupo hubenil aki.

   Durante un recien conferencia di prensa na Renaissance Convention Center, por a mira Maybeline Arends-Croes rondona door di e integrantenan di Young Voices, manera Lilian Boekhoudt, Mirugia de Cuba, Sandra Suarez-Croes, y Gina Werleman.

   Lilian Boekhoudt awendia ta cabezante di un Scol, den e conferencia el a splica cu e tabata un di e prome integrantenan di e grupo di The Young Voices.  P’e mes, esaki ta un recuerdo asina bunita di infancia y te na su hubentud, pues prome cu nan a bira profesionalnan y nan a canta asina hopi aña cu Maybeline.  Pa nan e show aki ta algo cu nan mester haci, y nan ta contento cu nan ta logrando, y nan kier pa tur hende cu ta fanatico di como 50 aña pasa di The Young Voices, pa nan acudi na e concierto y disfruta di e anochi.

    “Mi ta corda tempo cu Young Voices a cuminsa, nos tabata integrante di coro Tutti Frutti, anto for di eynan Maybeline a escohe algun, pasobra e no por a bay tur caminda, su grupo di coro ta 60 mucha, pues asina a forma su gruponan apart. E tabata tin The Sunrise y tambe el a forma The Young Voices caminda cu el a cuminsa manera algo manera spontaneo cu despues a bira un grupo asina popular y gusta y cu hasta nos a wordo pidi pa bay den exterior,” Lilian a declara.

   El a splica cu e prome biaha cu a biaha, nan a bay Santo Domingo cu e grupo original.  Lilian a agrega cu e conocido periodista Tito Laclé tambe tabata forma parti di The Young Voices e tempo aya.  Tambe ta corda Johnny Scharbaay kende semper a acompaña nan pasobra e ta e pianista ora cu nos mester core cambia paña, Johnny tabata toca un par di su cancionnan bunita.

   Boekhoudt a agrega cu nan a biaha pa Venezuela tambe, y esey tabata cu algun integrante nobo di The Young Voices, unda a bay canta na Caracas, y esey tambe tabata un experiencia hopi bunita.

   El a mustra cu na Aruba nan a canta tur caminda, e.o. na Tele Aruba unda hende kizas a cansa di mira nan den Showtime cu Tico Kuiperi y tambe Cocktail Musical di Ronny Marugg.

   Encuanto Tele Aruba, el a indica: “Nos tabata casi tur siman. Hopi leuk mes e periodo ey pasobra tur hende den Tele Aruba tabata conoce nos.  Nos tabata mucha ainda, core rond, tenta un poco. Pero e tabata hopi dushi periodo.”

   Lilian a agrega cu despues di esey, Maybeline a hiba nan pa e siguiente nivel, y a manda nan competi den festivalnan cu tabata algo super super dushi, hopi bunita, unda cu cada un por a demostra nan talento individual.  “Asina ey nos a sigui crece como grupo y tambe como cantante personal.  Partinan mas bunita di a forma parti di e grupo, y semper mi ta bisa, cu ademas cu Maybeline a siña nos canta, siña nos di musica, lo mas importante cu Maybeline a siña nos di ta sernan bon den nos comunidad, hendenan cu respet, hendenan cu principio, y nos a hay’e na cas pero Maybeline a reforze tur lugar unda nos tabata bay.  Y si nos a haci un cos cu no ta bon, nos ta wordo bati riba nos dedenan,” Boekhoudt a bisa.

   Su admiracion pa Maybeline, kende ademas di dirigi e muchanan musicalmente. Pero mester a dirigi nan como persona tambe.

   Liliana finalisa bisando: “Di mi parti, mi ta gradici Maybeline di mi curason. M’a drenta hopi hoben, y  te dia di awe Maybeline ta keda un hende cu ta un persona hopi importante den nos bida, gradiciendo Papa Dios cu e ta cu nos ainda y cu e tin hopi aña mas di bida cu nos por sigui disfruta cu Maybeline. Maybeline, masha danki pa tur e añanan.”

   E show lo ta riba Diadomingo 22 di November 2026 pa 7:00 pm den Renaissance Convention Center, y ya caba ticket ta na benta riba Pay.Aw na un forma facil y safe.