Lighting Parade a habri cu Massive Brass ta rindi tributo na ‘Asambeho’

ORANJESTAD (AAN): Un forma diferente di presenta Brassband por a wordo mira Diasabra anochi durante Lighting Parade na Playa. 

Pa exactamente 8:00 pm, Massive Brassband hunto cu SMAC a haci inauguracion di e Parada aki di luz, y na mesun momento Massive Brassband a start un fenomenal homenahe dirigi na e musica di Asambeho cu ta algo unico di Aruba.  Y e biaha aki sosteni pa e.o. Go Cultura Foundation, y tambe Aruba Tourism Authority.

   E idea tabata great!  Un trailer lastrando e Brass Section na halto, y abao por mira tur snares y drums ta wordo toca.

   Un celebracion di Cultura, Musica y Magia Carnavalesco!

Go Cultura Foundation ta sinti hopi honra, agradecido y entusiasma pa colabora atrobe cu Aruba Tourism Authority (A.T.A.) pa un otro proyecto espectacular di Carnaval.

   E aña aki, a presenta cu gran orguyo, Massive Brassband.  Cu un tributo na algo netamente di nos y cu ta forma parti importante di nos herencia musical: Asambeho.

   Massive Brassband su musiconan talentoso lo sacudi e cayanan di Aruba durante Carnaval 71 cu un energia sin igual.  Nan a presenta un ritmo contagioso, vibracion incontrolabel y un sonido cu ta impacta henter bo curpa.

  Go Cultura Foundation ta expresa nan gratitud na A.T.A. pa confia den nan pa presenta atrobe un proyecto cultural innovativo, y esaki tur  hende a lo largo di e ruta por a nota e energia inigualabel di Massive Brassband, den fenomenal uniform, den Aruba su gran Lighting Parade!

   Despues di Lightin Parade, pueblo por mira e proyecto aki durante e proximo tres paradanan: (1) Diahuebs, 27 di Februari na Parada di Luz, San Nicolas.  (2) Diasabra, 1 di Maart na Parada Grandi, San Nicolas. (3) Diadomingo, 2 di Maart na Parada Grandi, Oranjestad.

   Baila, goza y sinti e emocion di nos ritmo di Asambeho presenta pa Massive Brassband di un forma manera nunca antes nos a mira.   DIARIO ta felicita Edjean Semeleer di Go Cultura Foundation cu e logro aki.