Minister di Labor mr.Wendrick Cicilia
*Mas cu 9000 empleado lo conoce un aumento
ORANJESTAD (AAN): Minister di Labor, mr. Wendrick Cicilia, a duna prioridad pa trata ley pa introduci “salario minimo pa ora” cu lo percura cu entre 29-32% di e empleadonan den sector priva por conoce un aumento den salario pa cada ora cu nan efectua labor. Na final di un reunion largo, Parlamento a aproba e ley unanimamente.
Minister di Turismo, Labor y Transporte, mr. Wendrick Cicilia tabata presente den Parlamento di Aruba pa trata e ley di “Minimumuurloon”. A trata e concepto di ley cu prioridad, mirando cu Minister Wendrick Cicilia a indica cu su vision ta pa fortifica e posicion social-financiero y legal di esnan cu ta e motor di nos economia, esta nos trahadonan.
E ley di ‘minimumuurloon’ cu ta introduci un mecanismo nobo pa calcula salario minimo lo ta di beneficio pa mas cu 9000 empleado cu na e momentonan aki no tin un compensacion husto pa cada ora cu nan ta eherce labor. Esnan cu lo beneficia di ley aki ta esnan cu ta labora den e sector di hospitalidad, horeca y turismo.
Minister Wendrick Cicilia a indica cu a trata e ley aki cu prioridad y a defend’e den Parlamento di Aruba pa motibo cu e mecanismo nobo lo percura pa haci husticia na mas cu 30% di nos forsa laboral. Gabinete AVP-FUTURO ta reconoce cu mester utilisa diferente instrumentonan pa eleva capacidad di inversion y experiencia di bida di nos comunidad cu a mira nan situacion financiero empeora bou di e Gobierno anterior. Pa e motibo aki ta haci uzo di tur instrumento manera e adaptacion di ley di salario minimo pa mehora e capacidad di compra di nos comunidad.
Manera nobo pa calcula salario minimo basa riba un tarifa pa ora
E manera di calcula ta data desde aña 1972. Ta calcula e salario minimo a base di e NAD “normals arbeidsduur”. E NAD ta depende di e sector. Tin sector cu ta mantene 40 ora pa siman of entre 42 te cu 46 ora pa siman. Aunke tin diferencia den ora di trabou pa siman pa motibo di e mecanismo di calculo no tin un diferencia den compensacion fin di luna.
E motibo ta e mecanismo legal den ley di salario minimo pa calcula e salario pa luna. E mecanismo ta calcula a base di tarifa pa luna of siman manteniendo un siman trabou na 40 ora pa siman. E ley ta stipula un salario fiho pa luna of pa siman cu ta forma base pa e calculacion . E salario pa siman ta traduci den un salario minimo pa luna cu un factor di intercambio di 4.28. Esaki ta situacion anterior cu tabata causa inhusticia cu un empleado cu ta traha 40 ora pa siman ta ricibi e mesun salario cu un empleado cu ta traha 42,44 of 45 ora pa siman.
Beneficio amplio
E empleadonan cu ta traha 42 ora pa siman ta bay dilanti cu 121 florin pa luna, esnan cu ta traha 44 ora pa siman ta bay dilanti cu 221 florin pa luna y esnan cu ta traha 45 ora pa siman ta bay dilanti cu 271 florin.
Cu introduccion di e ley di “minimumuurloon” ta introduci un mecanismo di calculo di salario minimo a base di un tarifa pa ora pa labor efectual. Un salario minimo pa ora di 11.58 ta wordo proponi pa calcula e salario minimo pa siman y na momento ta bay haci e calculo pa luna, e factor di transformacion ta bira 4.333.
Minister mr. Wendrick Cicilia ta remarca cu su maneho di labor: “Ta basa riba husticia social unda e empleadonan tin oportunidad igual, derecho igual y trato husto y digno cu meta pa eleva e posicion financiero, social y legal di esnan cu ta labora”.
