E ta bay bende su propiedad cu stranhero
ORANJESTAD (AAN): Comerciante señor Hendrik Marsman recientemente na un forma hopi indigna, a duna declaracion cu e no lo sigui cu su proyecto pero lo bende su propiedad cu stranhero numa. Esaki, segun señor Marsman ta un decision cu el a tuma a raiz di e trato cu e ta hayando na DIP y e tempo largo cu e tin ta warda.
Señor Marsman a duna di conoce cu e no lo sigui cu su proyecto di 200 apartamento riba un tereno di 12 mil vierkante meter na playa. El a splica cu e manera cu el a wordo trata y e trayectoria pa keda cla cu su proyecto, ta motibonan suficiente pa e tuma e decision aki y bay bek na sirbi pueblo den su consultorio di dentista. Ta asina cu 21 aña pasa el a cumpra e propiedad menciona y a construi dos edificio eyriba na 2007.
Na 2016, señor Marsman a pidi permiso pa un bestemmingweiziging (cambio di destinacion) pa construi 200 apartamento. Pa motibo di investigacionnan den DIP, el a hay’e forsa ta logra e permiso aki despues di tres kortgeding den Corte. “Pa mi sorpresa, mi a haya e bestemmingweiziging pa contrui 200 apartamento pero cu restrincionnan cu solamente mi por bende cu Arubiano y no cu tranhero. Pa cua motibo mi a bay corte cu cuatro punto, entre otro pa mi por bende mi priopiedad cu stranhero tambe”, señor Marsman a indica.
Despues di hopi bay bin, DIP a pidi pa yega na un areglo pafo di corte na unda cu nan a duna di conoce cu no por haya permiso pa 200 apartamento sino pa 80 apartamento. Señor Marsman a indica cu el a reuni cu Minister Dowers kende a dun’e siguransa cu e lo haya permiso pa 80 apartamento pa vakantie. Sinembargo representantenan na DIP a indica cu e Minister no a duna autorisacion.DIP a bisa cu nan lo baha e cantidad na 40 unidad y pa caba cu e asunto mas lihe, señor Marsman a acepta. Despues di esaki, DIP a indica cu nan mester warda pa papia cu e minister di infrastructura nobo, Minister Herde. Pero e minister no a yama señor Marsman y nada a wordo regla.
”Awor mi a yega na e punto cu despues di 3 aña di perde mi tempo y a dedica mi energia y placa na e proyecto, cu mi no lo yega ningun caminda cu e gobierno aki y cu DIP. Mi a dicidi di bay bek consultorio di dialuna pa diabierna y yuda mi pashentnan como dentista y mi lo bende mi propiedad”, señor Marsman a duna di conoce.
Mientras tanto, señor Marsman a bisa cu DIP a admiti cu nan a abusa di nan poder y e caso ta sigui den Corte pa asina e por bende su propiedad cu strahnero tambe.
