Parlamentario Marco Berlis (MEP):
ORANJESTAD (AAN): Parlamentario Marco Berlis ta finalisando un ley crucial cu tin como meta pa proteha nos muchanan. E ley nobo aki ta enfoca riba limita e introduccion di loke ta wordo considera como "ideologia di genero" den scolnan, cu e meta di preveni exposicion prematuro na conceptonan compleho y potencialmente confuso pa muchanan.
E ley proponi tin como meta pa:
- Regula e contenido di lesnan relaciona cu topico di genero y sexualidad;
- Duna mayornan mas control riba e tipo di informacion cu nan yiunan ta ricibi tocante e temanan aki;
- Asegura cu e material educativo ta apropiado pa e edad di e studiantenan;
- Proteha e muchanan di abuso emocional;
- Proteha nos muchanan di stimulacion sexual inapropia.
Berlis ta argumenta cu muchanan chikito no tin e madures necesario pa procesa cierto conceptonan compleho tocante identidad y sexualidad. E ta enfatisa cu e rol principal di educacion ta pa prepara studiantenan pa nan futuro profesion, mientras cu temanan mas sensitivo mester keda den man di mayornan.
E impacto di e ley aki
Introduccion di e ley aki lo tin un impacto significante riba nos comunidad. E ley aki lo por:
- Fortalece e rol di famia den e educacion moral di muchanan.
- Protege e inocencia di hobennan.
- Mantene e balornan tradicional di nos sociedad.
Berlis ta subraya cu e ley aki ta un esfuerso pa balansa e derecho di mayornan cu e necesidad di un educacion completo. E ta enfatisa cu e gran mayoria di Aruba ta fiel na su balornan y normanan tradicional, incluyendo e importancia di famia, matrimonio y fe religioso. Segun Berlis, paisnan cu ta mantene balornan familiar fuerte generalmente ta score mihor den rapportnan internacional tocante stabilidad social y bienestar di mucha.
E parlamentario ta aplaudi e esfuersonan di Gabinete Wever-Croes pa cu su logronan pa combati abuso di mucha y ta mira e ley aki como un extension di e lucha ey. E ta argumenta cu expone muchanan na material sexual of di genero inapropiado pa nan edad por wordo considera como un forma di abuso emocional. Cu e introduccion di e ley aki, Berlis ta spera di fortifica e fundeshi moral di nos sociedad, protehando e inocencia di nos hobennan mientras ainda ta prepara nan pa e mundo moderno. E ta invita tur ciudadano pa apoya e iniciativa aki, mirando esaki como un paso importante pa preserva nos balornan Arubiano.
