Caribbean Poker Series 2024 cu otro evento exitoso

ORANJESTAD (AAN):  E edicion 2024 di Caribbean Poker Series a regresa Aruba den ful swing riba 26 di september pa un torneo hopi anticipa, como parti di MoneyMaker Tour.

E accion lo sigui te cu 6 di october, na momento cu e torneo lo conclui, cu premionan cash garantisa di US$ 300,000.

            Siguiendo e exito di e torneo di añanan anterior, localnan y hungadonan internacional ta actualmente disfruta di e hospitalidad unico di e isla y Casino Aruba. Na 2024, Aruba a bira e prome stop internacional di MoneyMaker Tour, mientras cu e compania tabata activo online, premiando ganadonan cu paketenan atractivo cual a inclui porcion di hotel pa nan trip y main event buy-in.

            E diferente weganan di poker den e torneo ta casi core rond ful e orario di dia. Siman cu a pasa, hungadonan a start na un tropical meet & greet, cual tabata un recepcion cu a tuma luga na e pool-deck, cual tambe a atende anochi di premiacion final di e siman. Mayoria di e torneo durante e dies dianan a tuma luga na morris Lapidus Ballroom, den e lobby abao, na unda cu mesanan di poker a keda specialmente prepara pa participantenan, cu mas live poker wardando nan parti paden di e casino mes, den e Poker Room.

            Pa loke tabata e premionan, 14 renchi y un bracelet a keda entrega na e evento di premiacion final di e torneo. Fanaticonan di poker a bini for di varios parti di mundo pa forma parti di e programa. E aña aki, e cantidad di hungadonan di poker femenino registra tabata dobel, y nan a disfruta di un evento special den colaboracion cu Plon, Poker League of Nations, un Ladies Social Luncheon y Ladies’ Poker Tournament, incluyendo algun paketenan atractivo y otro sorpresanan.

            Veronique Croes tabata e orador, kende a papia tocante con pa domina e wega, con pa trata cu erornan y competidornan, balansando e arte di Self Love & Poker.
            Poker competitivo, relahacion, y diversion di isla a presenta un oportunidad pa bishitantenan crea recuerdonan, mustra nan abilidadnan di poker, y experiencia e dushi ambiente di nos isla.

            Den e imagen por mira Chas Warning, di Surinam, cu un tremendo coleccion grandi di chips mientras e ta mustra e renchi cu el a caba di gana, su prome victoria, a pesar di a hunga poker na Aruba anteriormente cu hopi amor pa nos isla.