Levi Silvanie y One Happy Bowl ta organisa e prome "One Healthy Day 2022"

ORANJESTAD (AAN): - Diahuebs mainta durante un rueda di prensa e conocido cantante Levi Silvanie hunto cu One Happy Bowl (OHB) a anuncia e detayenan di Aruba su promer festival di salud.

           E festival ta hiba e homber di ‘One Healthy Day’ y lo tuma lugar dia 20 di Maart 2022.

            Mirando cu mundo completo ta pasando den momentonan cu diferente desafio incluyendo nos islanan ABC,  ta importante pa stimula salud fisico y mental. Esaki ta netamento un di e obhetivonan pa e proyecto di ‘One Healthy Day’. E organisadornan kier uni, inspira y activa nos comunidadnan pa ta mas consciente y pro-activo pa cu nan salud.

            ‘One Healthy Day’ ta un festival di 1 dia cu kier inclui tur persona riba nos isla d Aruba. Ora cu ta papia di ‘tur persona’ no ta referi na solamente edad of sexo pero tambe na nivel di salud y of abilidadnan fisico. Cu esaki por imagina cu lo tin algo pa tur hende por participa y na nan nivel. Aki por imagina actividadnan manera hiking, yoga, bailamento, deportenan den ekipo, bootcamps y mucho mas. E actividadnan lo cuminsa for di 5 or di mainta y lo sigui te cu 10 or di anochi rond di Aruba.

            E concepto ta cu tur rond di nos isla lo tin diferente actividad deportivo cu lo tuma lugar simultaneamente. E parti mas interesante di e dia aki ta cu tur e actividadnan , workshops etc lo ta completamente gratis. E idea ta pa di e forma aki promove un estilo di bida saludabel. Naturalmente lo tin un enfoke tambe riba e parti di cuminda. Pa asina educa e comunidad riba e importancia di come saludabel. Lo comunica cu restaurantnan pa e dia aki prepara un menu special cu enfoke riba salud.

            E deseo di e organisornan Levi Silvanie y OHB ta pa famianan hunto por explora e diferente organizacion, deportenan y otro iniciativanan cu Aruba ta ofrece pa asina por biba un bida mas den balans.

            Naturalmente kico ta un festival sin musica y entretenimento. ‘One Healthy Day’ lo tin presenta un programa amplio tambe di esaki.