Letitia Wever ta bay comparti  poesia cu el a cuminza skirbi for di mas cu 4 decada pasa

Dia Internacional di Poesia:

ORANJESTAD (AAN): Un di e personanan cu ta bay duna un presentacion riba 23 di Maart na Biblioteca Nacional pa celebracion di Dia Internacional di Poesia, ta Letitia Wever, kende a participa tambe pa Poeta di Patria.

Durante un conferencia di prensa Dialuna mainta Wever a indica cu for di prome cu añanan 80 caba e tabata pone su sentimentonan riba papel.

“Semper mi tabata tin miedo pa sali dilanti cu nan, pero mi rumannan tabata mi tras pa mi haci algo y publica esakinan”.

Mi ruman muher grandi a sigui pusha mi y a busca Mirto Laclé pa yudami y asina mi a haya e drive pa sigui pa dilanti, segun Wever.

El a sigui bisa cu Laclé a stimul'e pa e participa na Poeta di Patria y apesar di e miedo cu e tabata tin el a participa.

“Pesey mi a bisa cu mi no a bin pa competi, mi a bin pa comparti”.

Ora bo ta para ey dilanti bo no ta mira sala, pues mi no sa mucho bon kico a pasa eyden, pero comentarionan cu mi a haya ta cu hendenan a lanta para y nan a klap man y fluit.

Esey ta un empuhe pa mi sigui dilanti aworaki, segun Wever.

E poeta a splica cu tabata tin diferente topico mas cu e kier a incorpora den su poesia durante Poeta di Patria, pero como cu el a dicidi laat pa participa e no a haya chens pa traha riba esakinan.

Sushedad riba nos santo blanco causa pa construccion di mas condominium y destruccion entre otro di casnan di shoco door cu hende ta core cu vehiculonan riba nos duinnan, ta algun di e topiconan cu e kier a papia riba dje via su poesia.

Wever a splica cu e tin mas cu 100 poesia y e ta bezig ta print un buki, cual e ta spera cu lo keda cla pronto pa e por comparti su pensamentonan cu otro hendenan.