RIOHACHA: Autoridadnan a stop un truck pa haci control, y esaki a produci un captura grandi di droga.
Ta trata aki di 600 kilo di marihuana, cu a wordo intercepta door di Polis di Trafico y Transporte den e area di municipio Dibulla.
E Truck aki moviendo for di Cali rumbo pa Riohacha tabatin e chauffeur so abordo. Ora cu Polis a para esaki, a nota cu e tin documento pa transporta un cargamento di cuminda pa bestia. Pero agentenan a ripara algo abnormal riba e vloer di e trailer, cu tin e partinan reforza cu welding, y por a mira cu e trabao di welding a wordo haci masha malo mes.
Ora di a bay check e piso full bon, a ripara un pida cu tin un bom falso, y ora cu a habri esaki, a bin haya 1.200 paki empaketa cu marihuana tipo creepy comprimi, y hunto nan a pisa 600 kilo.
E chauffeur Jeremias Caceres Archila di 52 aña a wordo deteni pa delito di traficacion y di tin droga den su poder.
E marihuana aki tabata destina pa wordo poni despues riba speedboat tipo Gofast cu ta transporta esaki sea pa Centro America of Caribe.
