Lesa di e interesante storianan desconoci di Doctor José Gregorio Hernández

Awe tin su beatificacion

CARACAS: Venezuela lo celebra awe Diabierna e beatificacion di José Gregorio Hernández, un docter destaca naci na 1864 na Los Andes, cu a conkista pueblo pa su benevolencia y generosidad. 

   Pero tin hopi storia interesante keto bay cu ta relata parti di e bida di e Docter aki, cu publico en general no tabata sa di dje.

   Dr. José Gregorio Hernández su beatificacion a wordo aproba pa Papa Francisco, despues di a verifica e milagro cu el a concedi na e mucha muher Yaxury Solórzano, kende docternan no tabata duna speranza di bida despues di a haya un tiro na cabez.  Hopi hende no sa cu Dr. José Gregorio Hernández tabatin e dilema dado momento pa escoge cu e ta sigui dedica su bida exclusivamente na religion, of e lo hiba su bida cu un pareha.  Pero na final, e no a casa ni cu Iglesia, y tampoco cu un muher.

   Den e articulo aki, por lesa algun curiosidad mas di e bida di Dr. José Gregorio Hernández.

   HOPI RELIGIOSO:

   El a nace den e seno di un famia cu hopi balor religioso.  Esnan cu a traha riba su biografia a sigura cu for di chikito caba el a mustra cu e ta un persona cu stima Dios.  Ora cu el a cuminza bay scol na secundario, el a muda for di su pueblo di Isnotú pa Caracas, y el a bisa e Director di e Scol unda el a studia, esta Guillermo Tell Villegas, su deseo di ta “un bon Cristian”.  Esey ta loke e autor di e buki “El Doctor Hernández es nuestro”, Alfredo Gomez a skirbi.  Y for di eynan tur cos a cuminza.

   Pa su obediencia y inteligencia, el a wordo nombra como “Inspector di Disciplina” na scol, y a bira tutor di esnan cu tabatin dificultad cu algun vak na scol.

   Y pa e puesto ey, Jose Gregorio a haye den un pleito cu un hoben mas grandi cune, kende kier a dal e debi cu el a dune un straf pa disciplina.  E atake a wordo para door di Jose Gregorio, ora cu el a pusha e hoben na suela pa defende su mes, aunke e ta mas chikito.

   MORTO DEN FAMIA:

   Un di su rumannan muher, esta Maria Isolina, a fayece cu apenas siete luna di bida.  Su mama Josefa Antonia Cisneros, a muri despues di su ultimo parto, y pa e tempo ey ya caba Jose Gregorio tabatin ocho aña.  Su tata Benigno Hernandez a muri ora cu Jose Gregorio tabatin 26 aña y tabata studiando na Paris.

   Su ruman preferi, José Benjamin a fayece cu 24 aña di edad, debi na keintura geel, y un otro ruman, esta Pedro Luis, a muri un aña prome cu José Benjamin.

   José Gregorio mes nunca a casa, pero den su hubentud el a mustra interes pa varios mucha muher.  Su prome amor e tabatin cu 15 aña di edad, ora el a conoce Maria Gutiérrez Azpúrua, kende no tabata destina pe.  Pero el a interesa tambe den un mucha muher di fam Elizondo, segun un carta cu el a manda pa su amigo Santos Dominici, cita den e buki “Se llamaba José Gregorio Hernández”, skirbi pa Pastoor Francisco Javier Duplá.

   APORTE NA MEDICINA:

   Aunke e tabata kier a studia Ley, el a prepara pa ta Docter riba recomendacion di su tata, y a haya un beca pa specializa su mes na Francia y actualiza medicina na Venezuela.   José Gregorio a wordo encarga pa funda e prome laboratorio na Venezuela, y asina trece mas avance pa e epoca ey.

   Ademas di esey, e tabata dedica un ora pa dia pa atende e hendenan malo sin recurso economico, y varios biaha e tabata regala nan placa pa nan tratamentonan.

   Asina el a cuminza bira conoci como e “Docter di e Pobernan”, hasta ora el a wordo nombra como e Docter personal di Presidente Juan Vicente Gómez, segun e biografo Alfredo Gómez.

   Ora di a keda cla cu su estudionan na Caracas, el a regresa Los Andes pa traha como Docter, pero despues di varios luna viahando den e zona, autoridadnan local a cuminza consider’e como un ‘enemigo’.  Segun un carta publica den e buki di Pastoor Duplá, e docter a señala na Dominici cu Gobierno local ta hasta discutiendo pa expulse di e estado despues di a tilde di “godo” (conservador, oligarca), debi na su preparacion y e “bon puesto” cu su tata tin.  Asina pues el a regresa Caracas.

   E prome biaha cu e tabata kier a bira Sacerdote, e tabatin como 30 aña di edad, y a drenta den e orden Cartuja na Italia, pero su debilidad a impedi cu e por a sigui, y nan a recomende pa drenta den un comunidad menos austero, manera esnan di Jesuitanan.

   El a regresa Caracas y esey el a haci tambe, pero despues di un suplica di algun studiante di medicina na e Sacerdote cu a ricibie, nan a expresa na dje cu Venezuela tin mester di dje como docente y docter, y asina José Gregorio a bandona su deseo.

   Dado momento el a bira malo di Tuberculosis, y el a bandona e mision.

   FAYECIMENTO:

   Ta ser bisa cu despues di e fayecimento di su ruman Pedro na 1918, el a laga sa cu e mes lo muri e siguiente aña.  El a bisa tambe cu e ta ofrece su bida a cambio di e fin di Prome Guera Mundial, cual tratado a wordo firma un dia prome cu su fayecimento, esta 28 Juni 1919.

   Miles di su compatriotanan a acudi na su entiero, y ora cu e tabata wordo hiba pa santana, nan a cuminza grita “el doctor Hernández es nuestro” pa evita cu nan ta hibe den un garoshi, y nan mes a dicidi na carge riba su schoudernan.