ORANJESTAD (AAN): Prome Minister Evelyn Wever-Croes a laga sa cu el a tuma e campaña cu tin actualmente unda e musiconan ta sclama cu nan kier por traha bek.
E mandatario a indica cu e ta compronde nan preocupacion completamente. E ta convivi cu e situacion y su deseo ta pa e musiconan por toca bek manera nan ta custumbra.
Wever-Croes a duna di conoce cu el a pidi Crisis Team y Minister Glenbert Croes pa reuni cu e musiconan pasobra ta importante pa scucha nan y pa nan por compronde den ki situacion Aruba ta.
E reunion aki a tuma lugar diaranson atardi entre Crisis Team, Minister Glenbert Croes y e musiconan. E mandatario a laga sa cu el a tene cu e reunion a bay hopi bon.
Tin comprension pa e posicionnan di otro y esey ta algo hopi importante caba, Wever-Croes a remarca.
E tema di e musiconan no ta para riba su mes. E problema no ta musica. E problema ta e comportacion di algun ciudadano ora nan ta scucha musica cu nan ta bay para mas cerca di otro, cuminsa baila, grita, kita tapaboca, etc.
Den un anochi asina cu bailamento, cantamento of gritamento por haya cu e virus ta brota y ta perde e control atrobe riba e pandemia, a splica.
E mandatario a sigui bisa cu ta papiando cu e musiconan y splicando nan kico ta e protocolnan. Tur musico por traha, e unico limitacion ta cu riba escenario por tin un musico so, no un banda grandi. Musica Live por pero cu un persona so, a indica.
Despues di a sinta evalua e situacion, diahuebs atardi Crisis Team a dicidi cu ta bay bek na tres persona manera tabata tin'e poco tempo pasa. Door cu e cifranan di Covid ta bahando ta duna mas espacio pa flexibilisa mas, Minister Presidente a splica.
