Legado di Dr. Joel Rajnherc

Tin momento cu bida ta pidi algo simpel pero profundo: respet. E fayecimento di Dr. Joel Rajnherc no ta solamente ta un perdida di un dokter respeta y stima.

E ta e perdida di un lider cu a laga un marca profundo riba e manera cu nos isla ta pensa tocante cuido di salud.

Pa hopi hende na Aruba, Instituto Medico San Nicolas (ImSan) no ta solamente un institucion medico. E ta un simbolo di speransa, di inovacion y di cuido humano. Y durante añanan, e simbolo ey a wordo forma bou di liderazgo di Dr. Rajnherc.

P’esey mi a mira cu tristesa cu, mes dia cu a anuncia su fayecimento, ya tabatin speculacion den algun medio tocante posibel reemplasantenan. Incluso, den e tabloid cu hopi biaha ta actua como microphone di poder politico, dos persona sin diploma ni conocemento den cuido di salud a cuminsa discuti nombramentonan prome cu e pueblo a haya tempo pa procesa e perdida. Esaki ta hustamente un momento cu ta pidi sabiduria. Lo tabata apropia pa tin un pausa, un momento di reflexion, un momento di respet. Pueblo, pordonanan, pasobra hopi biaha hende no ta compronde e peso di nan palabranan.

Un legado cu no por wordo ignora

Pa duna un rato di respet debido, ta bon pa para keto na e legado indiscutibel di Dr. Rajnherc. Bou di su liderazgo, ImSan a bira un institucion reconoci tanto localmente como internacionalmente. Entre su logronan mas importante tin:

Acreditacion pa Joint Commission International (JCI),

Desaroyo di un centro di oncologia di nivel halto,

Reconocemento internacional pa calidad di cuido,

Y mas importante ainda: confianza di nos pueblo.

Pero talbes su logro mas grandi no tabata solamente infrastructura ni tecnologia. Tabata inverti den hende. Cualkier organizacion serio sa cu su recurso mas valioso no ta edificio ni aparato. Ta e profesionalnan cu ta traha tur dia pa e bienestar di pashentnan. Y den e area ey, Dr. Rajnherc a mustra algo raramente bisto: e capacidad pa inspira, guia y uni hende rond di un vision comun. Logronan manera esey no ta parece automaticamente. Nan ta fruto di un liderazgo berdadero.

E proximo paso

Kico awor? Eventualmente, ImSan lo tin un director nobo. Pero si Aruba ta serio tocante proteha e legado cu a wordo construi, e decision ey mester wordo tuma cu sabiduria, transparencia y responsabilidad.

Un lider pa un institucion medico moderno mester tin mas cu solamente competencia tecnico.

E mester tin experiencia cu liderazgo institucional, un record cla di proyectonan logra, y, mas cu tur cos, un capacidad comproba pa lidera hende.

Pasobra, na final, un hospital no ta djis un edificio. Ta trata un comunidad di profesionalnan dedica na cuido humano.

P’esey e decision cu lo wordo tuma lo mustra claramente si nos institucionnan a madura suficiente y ta pone interes di pashentnan na prome luga - of si nos ta sigui trata posicionnan clave den nos institucionnan como premio politico.

Un yamada pa madurez institucional

Aruba ta yega na un momento den su desaroyo institucional caminda e pueblo ta spera algo mas: transparencia y madurez den decisionnan publico.

Nombramentonan cu tin impacto grandi riba cuido di salud nacional no mester wordo percibi como resultado di calculacion politico, sino como resultado di un proceso serio, transparente y basa riba merito di e persona cu ta wordo nombra. Kico ta su track record? Un director cu nunca antes a lidera un team exitosamente dificilmente lo por cumpli cu e responsabilidad grandi cu e puesto ta exigi. Y nos no mester lubida: banda di e legado extraordinario cu a wordo construi na ImSan, e standard di liderazgo ta poni hopi halto.

Lo contrario tambe ta un hecho. Historia ta mustra cu ora un puesto importante ta bira recompensa politico, casi semper e institucion - y eventualmente pueblo - ta paga un prijs hopi caro. Den cuido di salud, e prijs ey por costa hasta bida.

Y si nos ta papia tocante cuido di salud, ta natural cu e boz di pashentnan tambe merece wordo tendi. Organisacionnan di pashent, cu representanan experiencia directo di cuido medico, por ofrece un perspectiva valioso den e proceso di reflexion tocante nombramento y liderazgo institucional.

Un legado cu merece proteccion

Dr. Joel Rajnherc no a construi solamente un institucion. El a construi un cultura di cuido humano cu calidad. E legado ey merece respet. E legado ey merece continuidad. Y e legado ey merece decisionnan cu ta honra e vision cu a haci ImSan bira loke e ta awe.Si nos por hasi esey, e ora nos no solamente ta honra memoria di un dokter extraordinario. Nos ta honra tambe nos mes como pueblo. Cuido di salud no ta pertenece na ningun partido politico. E ta pertenece na nos tur como pueblo. 

Cu e proximo liderazgo di ImSan, mi ta spera cu e legado di Dr. Joel Rajnherc lo sigui biba - den e institucion cu el a yuda construi y den e cuido humano cu nos pueblo merece.

Skirbi pa doctor Jayburtt J. Dijkhoff
Experto den derechonan di salud publico y Presidente Fundacion SIKI